BAÁ-de bılıardtyń «Pýl-8» túrinen Álem chempıonaty ótip jatyr
ALMATY. 15 aqpan. QazAqparat - Birikken arab ámirliginiń El Fýdjera qalasynda 13-17 aqpan kúnderi bılıardtyń «Pýl-8» túrinen Álem chempıonaty bolady.
Onda alǵashqy eki kúni 96 sportshy birneshe topqa bólinip ózara kúsh synasty. Búgin olardyń arasynan úzdik 64-i anyqtaldy. Erteń endi olar taǵy iriktelip, eń úzdik 16 sportshy arasynda shırek fınaldyq saıystar ótedi. Al juma kúni jartylaı jáne aqtyq saıystar bolady. Oǵan jarys qojaıyndarymen qatar AQSh, Avstralııa, Germanııa, Japonııa, Ispanııa, Italııa, Kanada, Katar, Koreıa, Qytaı, Polsha, Fılıpın, Taıpeı, Úndistan jáne taǵy basqa da kóptegen elderden 80-nen astam sportshy qatysýda. Olardyń arasynda burynǵy keńestik respýblıkalar arasynan tek Reseıdiń bılıardshylary ǵana bar.
Dúbirli dodanyń jeńimpazyna 20 myń AQSh dollary beriledi. Aqtyq fınalda óner kórsetken ekinshi sportshy 15 myń, 3-4 oryn alǵandar 7,500 dollar alady. Al 5-8 oryndardy ıelengender 4,5 myńnan, 9-16 oryndaǵylar 3 myńnan, 17-32 oryndaǵylar 2 myńnan, 33-64 oryndaǵylar 900 jáne 95-80 oryndaǵylarǵa 250 dollardan berilmek.
