BAÁ BUU Bas hatshysy qyzmetine óz úmitkerin usyndy
ASTANA. KAZINFORM – BUU-nyń jańa Bas hatshysyn saılaý barysynda Qaýipsizdik Keńesiniń turaqty músheleri ázirge ortaq kandıdatýraǵa kelise almaı otyr, dep habarlaıdy Kazinform agenttiginiń menshikti tilshisi.
Birikken Arab Ámirlikteri 21 qazanda memlekettik mınıstr, sondaı-aq eldiń BUU men Eýropa odaǵy janyndaǵy arnaıy ókili Lana Nýseıbeni Birikken Ulttar Uıymynyń Bas hatshysy qyzmetine resmı túrde usyndy. Bul týraly WAM memlekettik aqparat agenttigi málimdedi.
48 jastaǵy dıplomattyń kandıdatýrasy BAÁ prezıdenti sheıh Muhammed bın Zaıd Ál Nahaıannyń BUU Bas Assambleıasy men Qaýipsizdik Keńesiniń tóraǵalaryna joldaǵan hatynda usynyldy.
Nýseıbeniń kandıdatýrasy BUU Qaýipsizdik Keńesinde alty kezeń daýys berý ótkizilgenimen, bes turaqty múshe — AQSh, Reseı, Qytaı, Ulybrıtanııa men Frantsııanyń bárine birdeı qolaıly úmitker anyqtalmaǵan tusta usynyldy.
Reuters agenttiginiń habarlaýynsha, 16 qazandaǵy sońǵy beıresmı daýys berýde barlyq úmitkerge BUU Qaýipsizdik Keńesiniń turaqty músheleriniń keminde ekeýi qarsy daýys bergen. Aldyn ala daýys berý nátıjesinde Kosta-Rıkanyń burynǵy vıtse-prezıdenti Rebeka Grınspan eń kóp qoldaýǵa ıe boldy.
Basylymnyń jazýynsha, AQSh prezıdenti Donald Tramptyń ákimshiligi buǵan deıin qaralǵan jeti úmitkerdiń bárine qarsy bolǵan.
BAÁ ókiliniń kandıdatýrasy Qaýipsizdik Keńesindegi jaǵdaıǵa yqpal etýi múmkin. Buǵan Ábý-Dabıdiń Vashıngtonmen tyǵyz qarym-qatynasy jáne Ámirlik basshylyǵynyń Keńestiń ózge turaqty múshelerimen berik baılanysy negiz bola alady.
Lana Nýseıbe Reuters agenttigine bergen suhbatynda BUU-nyń halyqaralyq daǵdarystardy dıplomatııalyq jolmen sheshýdegi rólin kúsheıtýdi maqsat etetinin málimdedi.
— Búginde bizge kópjaqty yntymaqtastyq qaǵıdattaryn nyǵaıtyp, BUU-ny álemdik daǵdarystardy syrttaı baqylap qana qoımaı, olardy sheshýge naqty úles qosatyn uıymǵa aınaldyra alatyn Bas hatshy qajet, — dep atap ótti ol.
Usynylǵan baǵdarlamada qarýly qaqtyǵystardyń aldyn alý, deldaldyq tetikterdi nyǵaıtý jáne BUU jumysynyń tıimdiligin arttyrý negizgi basymdyqtar retinde belgilengen. Nýseıbe jabyq dıplomatııalyq kelissózderdi jandandyrýǵa, jergilikti bitimge qol jetkizýge, tutqyndar almasýyn uıymdastyrýǵa jáne gýmanıtarlyq kómektiń jetkizilýin qamtamasyz etýge basymdyq bermek.
Onyń baǵdarlamasynda BUU-ny reformalaýǵa da erekshe nazar aýdarylǵan. Atap aıtqanda, qaıtalanatyn mindetterdi qysqartý, jumys nátıjeleri úshin jaýapkershilikti kúsheıtý jáne daǵdarys jaǵdaıyndaǵy óńirlerde tikeleı jumys isteıtin mamandardyń ókilettikterin keńeıtý kózdelgen.
Lana Nýseıbe 2013–2024 jyldary Birikken Arab Ámirlikteriniń BUU janyndaǵy turaqty ókili qyzmetin atqardy. Ámirlikter 2022–2023 jyldary Qaýipsizdik Keńesiniń múshesi bolǵan kezeńde ol eki ret Keńeske tóraǵalyq etti. Sondaı-aq BUU Bas Assambleasy tóraǵasynyń orynbasary qyzmetin atqaryp, «BUU-Áıelder» qurylymynyń Atqarýshy keńesin basqardy.
Lana Nýseıbeniń dıplomatııalyq qyzmetindegi eleýli nátıjelerdiń biri — 2023 jylǵy jeltoqsanda BUU Qaýipsizdik Keńesiniń Gaza sektoryna gýmanıtarlyq kómekti jetkizýdi ulǵaıtýǵa baǵyttalǵan №2720 qararynyń qabyldanýy.
Sonymen qatar Ámirlik dıplomatynyń kandıdatýrasyna saıası kedergiler de týyndaýy múmkin.
Reuters agenttiginiń jazýynsha, Sýdandaǵy Jedel áreket etý kúshterine áskerı qoldaý kórsetti degen aıyptarǵa baılanysty BAÁ synǵa ushyraǵan. Alaıda Ábý-Dabı bul aıyptaýlardy joqqa shyǵarady.
Nýseıbe Bas hatshy saılaýyna qatysý úshin memlekettik qyzmettegi jumysynan demalys alǵanyn málimdep, Sýdandaǵy gýmanıtarlyq daǵdarysqa erekshe kóńil bóletinin aıtty.
Eger Lana Nýseıbe saılansa, BUU tarıhyndaǵy alǵashqy áıel Bas hatshy ári Mysyr ókili Býtros Býtros-Galıden keıin bul qyzmetti atqarǵan Taıaý Shyǵystyń ekinshi ókili atanady. Býtros-Galı uıymdy 1992–1996 jyldary basqarǵan.
Eske sala keteıik, 2025 jylǵy qarashada BUU jańa Bas hatshyny saılaý protsesin bastady.
Qazirgi Bas hatshy Antonıý Gýterrıshtiń ókilettik merzimi 2026 jylǵy 31 jeltoqsanda aıaqtalady.
Jańa Bas hatshyny taǵaıyndaý úshin aldymen BUU Qaýipsizdik Keńesiniń usynymy qajet. Túpkilikti sheshimdi Bas Assambleıa qabyldaıdy. Keńestiń bes turaqty múshesiniń kez kelgeni úmitkerdiń kandıdatýrasyna qarsy shyǵyp, onyń maquldanýyna kedergi keltire alady. Sondyqtan uıymnyń jańa basshysyn saılaýda iri derjavalar arasyndaǵy ortaq kelisim sheshýshi mánge ıe.
Buǵan deıin de halyqaralyq uıymnyń Bas hatshysy qyzmetine usynylǵan ózge úmitkerler týraly jazǵan edik.
