BAÁ 15 jasqa tolmaǵan balalarǵa áleýmettik jelilerdi paıdalanýǵa tyıym saldy
ASTANA. KAZINFORM – Birikken Arab Ámirlikteriniń Mınıstrler kabıneti áleýmettik jelilerge kirýdiń eń tómengi jasyn 15 jas deńgeıinde belgilengen qaýly qabyldady, dep habarlaıdy WAM.
Jańa erejelerge sáıkes, 15 jasqa tolmaǵan balalarǵa áleýmettik jelilerde jeke akkaýnttar qurýǵa, paıdalanýǵa nemese basqarýǵa, sondaı-aq kontent jarııalaý, pikir bildirý, habarlama jiberý jáne qoǵamdyq toptar men arnalarǵa qatysý sııaqty negizgi fýnktsııalaryn paıdalanýǵa tyıym salynady.
15 jastan 16 jasqa deıingi jasóspirimderge áleýmettik jelilerge tek kúsheıtilgen qaýipsizdik sharalary qoldanylǵan jaǵdaıda ǵana kirýge ruqsat etiledi. Olarǵa kontentti jas erekshelikterine sáıkes súzý, belgisiz paıdalanýshylarmen baılanysqa shekteý salý, platformalardy paıdalaný ýaqytyna negizdelgen baqylaý jáne ata-ana baqylaýynyń quraldary kiredi.
Qaýly áleýmettik platformalardan jasty rastaýdyń senimdi tetikterin engizýdi talap etedi.
Jasty óz betinshe kórsetý endi jetkilikti rastaý dep sanalmaıdy. Tekserý úshin sandyq sáıkestendirý, jasandy ıntellekt negizindegi bıometrııalyq tehnologııalar jáne Balalardyń sandyq qaýipsizdigi keńesi bekitken basqa quraldar paıdalanylýy múmkin.
Budan basua, platformalar 15 jasqa tolmaǵan balalardyń belgilengen shekteýlerdi buza otyryp qurǵan akkaýnttaryn anyqtaýy jáne buǵattaý kerek. Bul rette ata-ananyń kelisimi paıdalanýshylardy jańa erejelerdi saqtaýdan bosatpaıdy.
Áleýmettik platformalarǵa óz qyzmetterin jańa talaptarǵa sáıkestendirý úshin 12 aılyq ótpeli kezeń usynyldy. El bıligi bul bastamany platforma qaýipsizdigin, esep berýshilikti jáne otbasylyq quqyqtardy qorǵaýdy biriktiretin balalardy tsıfrlyq qorǵaýdyń jańa modeliniń bóligi retinde sıpattaıdy.
BAÁ bıligi qujattyń qabyldanýyn balalar úshin sandyq táýekelderdiń artýyna, sonyń ishinde orynsyz kontentke qol jetkizýge, qaýipsiz emes onlaın ózara árekettesýge, jeke derekterdi jınaýǵa jáne áleýmettik jelilerdi shamadan tys paıdalanýǵa jaýap retinde atady. Olardyń aıtýynsha, jańa erejeler kámeletke tolmaǵandardy tsıfrlyq qorǵaý salasyndaǵy jahandyq úrdisterge sáıkes keledi jáne balalar úshin qaýipsiz onlaın orta qurýǵa baǵyttalǵan.
Osyǵan deıin Ulybrıtanııa 16 jasqa tolmaǵan balalarǵa áleýmettik jelige kirýge tyıym salatynyn jazdyq.
