BAÁ 100 mıllıon mangr aǵashyn otyrǵyzbaq

ASTANA. KAZINFORM — Birikken Arab Ámirlikteri 2030 jylǵa deıin 100 mıllıon mangr aǵashyn otyrǵyzý boıynsha aýqymdy ekologııalyq bastamany qolǵa aldy. Bul týraly eldiń Klımattyń ózgerýi jáne qorshaǵan orta máseleleri jónindegi mınıstrligi habarlady, dep jazdy AZERTADJ.

Sheteldik BAQ-ta taraǵan derekkózge saı, joba Halyqaralyq mangr ekojúıelerin qorǵaý kúnine oraılastyrylǵan. Onyń basty maqsaty — jaǵalaý aımaqtarynyń klımattyń ózgerýine tózimdiligin arttyrý jáne teńiz florasy men faýnasy úshin qolaıly orta qalyptastyrý.

Inıtsıatıva aıasynda qazirgi tańda 30 mıllıonnan astam aǵash otyrǵyzylǵan, olardyń bir bóligi drondardyń kómegimen otyrǵyzylǵan. Belgili bolǵandaı, mangr aǵashtary teńiz deńgeıiniń kóterilýi men jahandyq jylynýdyń saldarynan tabıǵı qorǵanys qabyrǵasy qyzmetin atqarady.

Sonymen qatar, mangr aǵashtary kómirqyshqyl gazyn sińirý qabiletimen erekshelenedi, tipti bul kórsetkish tropıkalyq ormandarǵa qaraǵanda tórt ese joǵary. Olar kóptegen teńiz organızmderiniń tirshilik etý ortasy bolyp sanalady jáne ekologııalyq tepe-teńdikti saqtaýda mańyzdy ról atqarady.

Halyqaralyq deńgeıde BAÁ Mangrove Alliance for Climate (MAC) bastamasyn ilgeriletýde. Bul bastamaǵa 45 el men uıym múshe. Sonymen qatar, Ámirlikter Indonezııadaǵy Muhammed ben Zaed pen Djoko Vıdodo atyndaǵy Halyqaralyq mangr zertteý ortalyǵyn qarjylandyrady.

Bıyl qazan aıynda Abý-Dabıde Tabıǵatty qorǵaý jónindegi Halyqaralyq odaqtyń (IUCN) qoldaýymen Dúnıejúzilik tabıǵatty qorǵaý kongresi ótedi. Kongress jumysynyń negizgi baǵyty — mangr ekojúıelerin saqtaý bolmaq.

Eske sala keteıik, BAÁ-de aýa temperatýrasy mamyr aıyndaǵy rekordtyq deńgeıge jetkenin jazǵan edik.