«B5+1» forýmy: AQSh pen OA elderiniń ekonomıkalyq yntymaqtastyǵy nyǵaıyp keledi
ASTANA. KAZINFORM — Ónerkásip jáne qurylys mınıstri Ersaıyn Naǵaspaev Qazaqstan delegatsııasyn bastap, Qyrǵyz Respýblıkasynyń Bishkek qalasynda ótken ekinshi «B5+1» iskerlik forýmyna qatysty. Forým Ortalyq Azııa memleketteri men Amerıka Qurama Shtattary arasyndaǵy ekonomıkalyq yntymaqtastyqty nyǵaıtý máselelerine arnaldy.
Іs-shara barysynda Ersaıyn Naǵaspaev ınvestıtsııalyq ahýaldy jaqsartý, ınstıtýtsıonaldyq tetikterdi kúsheıtý jáne turaqty, ózara tıimdi nátıjelerge qol jetkizý maqsatynda Qazaqstannyń bıznes-qoǵamdastyqpen jáne basqa da múddeli taraptarmen ashyq ári syndarly yntymaqtastyqqa daıyn ekenin atap ótti.
Forým aıasynda mınıstr AQSh Prezıdentiniń Ońtústik jáne Ortalyq Azııa isteri jónindegi arnaıy ókili Serdjıo Gormen kezdesti. Kezdesý barysynda ónerkásip jáne ınvestıtsııa salalaryndaǵy ekijaqty jáne óńirlik yntymaqtastyqtyń keleshegi talqylandy.
Kezdesýde Ersaıyn Naǵaspaev Serdjıo Gordyń 2025 jylǵy qarashada Vashıngton qalasynda ótken C5+1 kóshbasshylarynyń 10-shy mereıtoılyq sammıtine qatysqannan keıin Qazaqstan–AQSh qatynastarynyń ilgerileýine qosqan úlesin atap ótti.
Mınıstr Serdjıo Gordy 2026 jylǵy 2–3 sáýir kúnderi Astana qalasynda ótetin Birinshi Ortalyq Azııa geologııalyq forýmyna qatysýǵa shaqyrdy.
Sonymen qatar forým qorytyndysy boıynsha mınıstr Ortalyq Azııa elderi men AQSh delegatsııalarynyń basshylarymen birge baspasóz máslıhatyna qatysyp, «B5+1» forýmy jumysynyń negizgi nátıjelerin qorytyndylady.
Eske sala ketsek, Bishkekte «Ortalyq Azııa + AQSh» ekinshi bıznes forýmy ótip jatqanyn habarladyq.
Al buǵan deıin Almatyda AQSh pen Ortalyq Azııa elderi arasyndaǵy «V5+1» platformasy resmı iske qosylatynyn jazdyq.