B2B Jewelry qarjy pıramıdasy 10 myńnan astam adamnyń aqshasyn jymqyrǵan
ALMATY. QazAqparat - Almatyda «B2B Jewelry» uıymdastyrýshylaryna qatysty tergeý jalǵasýda, dep habarlaıdy QazAqparat Qarjy monıtorıngi komıtetine silteme jasap.
Komıtettiń Almaty qalasy boıynsha ekonomıkalyq tergeý departamenti Almaty prokýratýrasynyń úılestirýimen zergerlik dúkender jelisi atyn jamylyp, «B2B Jewelry» qarjy pıramıdasyn uıymdastyrǵandarǵa qatysty sotqa deıingi tergeýdi jalǵastyryp jatyr.
Qylmystyq istiń materıaldaryna sáıkes, uıymdastyrýshylar halyqqa satyp alý somasynyń 104% mólsherinde «keshbek» túrinde aqsha qaıtarý kepildigimen zergerlik buıymdardy satqan.
Sonymen qatar, klıentterge satyp alynǵan sertıfıkattyń quny men pıramıdaǵa tartylǵan adamdardyń sanyna baılanysty jylyna 520% kiriske deıin kepildik beretin «altyn» men «kúmiske» arnalǵan syılyq sertıfıkattar satylǵan.
ETD qyzmetkerleri júzege asyrǵan sharalardyń saldarynan qarjy pıramıdasynyń salymshylary salǵan 560 mln astam teńge, 303 myń AQSh dollary jáne 3 500 evro tárkilenip alyndy.
Qarjy pıramıdasy salymshylarynyń jalpy sany - Qazaqstannyń barlyq aımaqtaryn qosa eseptegende 10 000 astam adam.
Qazirgi ýaqytta sotqa deıingi tergeý aıasynda QR QK 217-babynyń 3-bólimi 2-tarmaǵyna sáıkes jedel-tergeý is-sharalary júrgizilýde.
Kúdikti tulǵaǵa qatysty «qamaýda ustaý» bultartpaý sharasy qoldanyldy.
Osyǵan oraı, qarjy monıtorıngi komıteti osy jobanyń qylmystyq áreketinen zardap shekken azamattardyń komıtetke jáne Almaty qalasy boıynsha departamentke (Telefondary: 87786376213, 87028886449, 87017446040, 87074064945) júginýin ótinedi.
Basqa qala turǵyndary komıtettiń aýmaqtyq ekonomıkalyq tergeý departamentterine habarlasa alady.
Sondaı-aq, Ýkraınanyń qaýipsizdik qyzmeti osyǵan uqsas is boıynsha B2B zergerlik pıramıdasynyń negizin qalaýshy Nıkola Gontqa qatysty tergeý júrgizip jatyr.
