B.Jumaǵulov: jyl saıyn túlep ushatyn 34 myń jas ustazdyń tek 30 paıyzy mamandyǵy boıynsha jumysqa keledi

Bul týraly búgin Astanada bastalǵan «Muǵalimniń kásibı damýy: dástúrleri men ózgeristeri» atty halyqaralyq ǵylymı-tájirıbelik konferentsııada QR Bilim jáne ǵylym mınıstri Baqytjan Jumaǵulov málim etti.

Mınıstrdiń aıtýynsha, Qazaqstanda jańa býyn urpaqty daıarlaýdyń túbegeıli jańa sapasy qajet. Bul pedagogtardy daıarlaıtyn oqý oryndarynda bilim berý standarttaryn qaıta qaraýdy talap etedi. Máselen, pedagogıkalyq mamandyqtarǵa túsetin talapkerlerdi irikteýdi kúsheıtý kerek.

«Olardyń tek daıyndyq deńgeıin emes, kásibı jaramdylyǵyn (kóptegen parametrler boıynsha), muǵalimdik jumysqa kelýiniń sebebin anyqtaý qajet. Eń jaqsy jastarymyzdy osy salaǵa tartý úshin olardy yntalantyrý kerek. Biz qazir pedagogıkalyq mamandyqtarǵa granttyń qunyn jáne stýdentterdiń bilim alý jaǵdaılaryn arttyrý, kásiptiń mártebesi men pedagogtyń bedelin kóterý, oǵan laıyqty ebekaqy tóleý máselelerin qarastyryp jatyrmyz», - dedi B.Jumaǵulov.

Sondaı-aq, vedomstvo basshysy atap kórsetkendeı, pedagogıkalyq JOO-lardyń usynysy men eńbek naryǵynyń suranysyna taldaý jasaý qajet.

«Bul máselede ázirge úlken dısbalans bar. Jyl saıyn pedagogıkalyq mamandyqtar boıynsha barlyǵy 34 myń jas ustaz túlep shyǵady. Olardyń tek 30 paıyzy ǵana mamandyqtary boıynsha jumysqa ornalasady, onyń ózinde 2-3 jyl bolmaı ózge salaǵa ketedi. Qalǵandary pedagogıkadan tys salalarda qyzmet atqarady. Mundaı jaǵdaıǵa oryn berilmeýi tıis. Bul pedagogıkalyq JOO-lar jumysynyń tıimdiligin birden tómendetedi. Biz bul jaǵdaıdy ózgertetin bolamyz, tipti, pedagogtardy daıarlaıtyn JOO-lardyń sanyn qysqartýǵa barmyz», - dedi ol.

Eske salsaq, bıyl QR BǴM muǵalimderdi aqyly jáne granttyq negizde daıarlap kelgen 89 JOO-nyń sanyn 43-ke qysqartty. Qalǵan JOO-lardyń ózin mınıstrliktiń jańa talaptaryn oryndaý boıynsha qaıta synaqtan ótkizýdi kózdep otyr.