B.Jumaǵulov: Jasóspirimniń ish kıimine deıin qaraý emtıhan tapsyrýǵa kelgen túlekti qorlaý - respýblıkalyq basylymdarǵa sholý
***
Álemdi jaılaǵan qarjy daǵdarysy barǵan saıyn ýshyǵa túsýde. Bolashaqtyń bulyńǵyrlyǵy men aldaǵy kórinistiń belgisizdigi, ásirese, «kári qurlyq» elderi jurtyn san-saqqa júgirtip qoıdy. Kontınent turǵyndarynyń deni «neden jazdymǵa» boı aldyryp, sary ýaıym qorshaýynan shyǵa almaı otyr. Sozylmaly syrqattyń sońǵy sıpaty kóp jyldardan beri batys jarty shar elderiniń ustyny men dińgegi bolyp kele jatqan Eýropa odaǵyn da túbirinen shaıqaltyp, birjola ydyratpaı tynbaýǵa qaraǵan sııaqty. Sonymen batysty jaılaǵan daǵdarys jaıynda «Egemen Qazaqstan» gazetiniń senbilik sanyndaǵy «Sozylmaly syrqattyń sońǵy sıpaty» degen taqyryptaǵy maqalada keńinen baıandalǵan.
«Qaıran qara jer saýdagerlerdiń qara saýdasyna túsip, saýdalanyp saý tamtyǵy qalmaı barady. Bul ata-babamyzdyń urpaǵyna qaldyrǵan ortaq jeri edi ǵoı dep jany ashıtyndar da azaıdy. Qazanshynyń erki artyp, qonyshtan basý kóbeıdi. Sonyń saldarynan jer telimderin zańsyz jeke menshikke satý jáne saýdalaý etek aldy, dep atap aıtyldy keshe Parlament Senatynyń depýtaty O.Ábdikárimovtiń tóraǵalyǵymen ótken «Nur Otan» HDP janyndaǵy Jemqorlyqpen kúres jónindegi respýblıkalyq qoǵamdyq keńestiń otyrysynda», - dep jazady «Egemen Qazaqstan» gazeti. Maqala «Zańsyzdyqqa qarsy sharalar qaraldy» degen taqyryppen berilgen.
***
«Aıqyn» gazetinde Abaı atyndaǵy QUPÝ-dyń oqý isi jónindegi prorektory professor Aqtolqyn Qulsarıevamen aradaǵy suhbat «Pedagog kadrlar daıyndaý isi - zııatker ult bolashaǵynyń kilti» degen taqyryppen berilgen. Basylym tilshisiniń barlyq saýalyna egjeı-tegjeıli jaýap bergen ǵalym: «Eldiń jańǵyrýy týraly aıta otyryp, biz myna jaıtty esten shyǵaryp almaýymyz kerek. Bul mindetti sheshý bizdiń elimizdegi azamattardyń birneshe býynynyń múddesi, jıyntyq baǵdarlamasy bolady. Al árbir urpaq ókiliniń óziniń qundylyqtary, ómirlik baǵdary bar. Olardy esepke alý pedagogıkanyń ulttyq sıpatyn da, jańashyldyq sıpatyn da teńdep ustaýǵa járdemdesedi», - deıdi.
***
Aldaǵy ýaqytta Smart-Lift jobasy aıasynda elordadaǵy barlyq lıftilerdi basqarý bir júıege jınaqtalatyn bolady. Osy júıeniń artyqshylyǵyn «Astana aqshamy» basylymyna shaǵyn suhbat bergen «Astana Innovations» AQ-nyń basqarýshy dırektory aıtyp beripti. «Búginde túrli lıft kompanııalary túrli modıfıkatsııadaǵy kartalardy paıdalansa, biz biryńǵaı tólem júıesin engizýdi usynamyz. Bul - kireberis arqyly kirý jáne osy kilt júıesin lıftige paıdalaný. Bolashaqta biz lıftiniń ishine beınebaqylaý engizýdi josparlap otyrmyz», - deıdi ol. Shaǵyn suhbat «Jedelsaty basqarýdyń ortaq júıesi engiziledi» degen taqyryppen berilgen.
***
2015 jylǵa qaraı Atyraý munaı óńdeý zaýyty Eýro-5-ke kóshedi. Bul jaıyna «Lıter» basylymyndaǵy «Evropeıskıı standart» degen taqyryptaǵy maqalada keńinen baıandalǵan. Basylymnyń atap ótýinshe, taıaý kúnderi ǵana zaýyt Qytaıdyń Eksporttyq-ımporttyq bankimen nesıe kelisimine qol qoıǵan. Jalpy somasy 1,1 mlrd dollardy quraıtyn kredıt munaıdy tereńdetip óńdeý kesheniniń qurylysyna baǵyttalady. Osylaısha zaýytty keshendi jańǵyrtýdyń sońǵy kezeńi aıaqtalady.
***
QR Bilim jáne ǵylym mınıstri Baqytjan Jumaǵulov Ulttyq biryńǵaı testileýge qatysty «Vremıa» gazetiniń oqyrmandary saýaldaryna jaýap bergen. Qazaqstan halqy mınıstrge UBT-ǵa qatysty san alýan saýaldar joldaǵan. Olardyń qatarynda taıaýda ǵana UBT kezinde balalardyń ar-namysyna nuqsan keltirilýi faktisi de bar. «Men 1 maýsymda-aq mundaı faktilerge jol berilmeıtinin aıtqan edim. Degenmen ókinishke oraı Astanadaǵy Agrotehnıkalyq ýnıversıtette osyndaı fakti oryn aldy. Ata-analar óte durys zańdy aryz berip otyr jáne bul úshin kináli qyzmetkerler jazalanady. Jasóspirimniń ish kıimine deıin qaraý emtıhan tapsyrýǵa kelgen túlekti qorlaý», - dedi mınıstr.
