B.Jumaǵulov «Jas ulan» mektebiniń tárbıelenýshilerin Otan qorǵaýshylar merekesimen quttyqtady
ASTANA. 4 mamyr. QazAqparat - QR Bilim jáne ǵylym mınıstri Baqytjan Jumaǵulov «Jas ulan» respýblıkalyq mektebiniń jas tárbıelenýshilerin Otan qorǵaýshylar merekesimen quttyqtady, dep habarlady vedomstvonyń baspasóz qyzmetinen.
Jas ulandarmen mınıstr jańa zamanaýı mekteptiń 7 korpýsymen tanysyp shyqty. Mekteptiń jańa ǵımaraty óte qolaıly. Ol negizgi úsh bólikke bólingen. Oqýshylardyń kontıngenti 18 synyp-keshendi quraıdy, 5 oqý rotasynda 84 adam bar. Búginde atalmysh mektepte orta bilim berý, onyń ishinde memlekettik jáne shet tilderin tereńdetip oqytý, áskerı tártip pen tolyq memleketti qamtamasyz etýdegi kúsheıtilgen fızıkalyq daıyndyq júzege asyrylýda.
Oqýshylar mınıstrge aǵylshyn tilin tereńdetip oqytatyn «Funny English» atty klýb uıymdastyrylǵanyn aıtyp ótti. Al joǵarǵy synyptarda matematıka, fızıka syndy salalyq pánder toptarǵa bólinetinin habarlady.
Sonymen qatar, jalpy pánderdi oqytý boıynsha 41 kabınet tehnıkalyq jabdyqtarmen qamsyzdandyrylǵan. Kompıýterlik synyptardyń birinde mınıstr oqýshylardyń elektrondyq oqýlyqty qalaı paıdalanatynyn baqylady. Ulandyqtar elektrondy oqýlyqpen qyzyǵa oqıtyndyqtaryn, tıimdi tásil arqyly este jyldam saqtaý múmkindigi artatynyn aıtty.
Bilim mınıstri oqý úderisine óziniń oń baǵasyn berdi. Sonymen qatar, BǴM basshysy mekteptegi oqý-ádistemelik istiń durys uıymdastyrylýyna yqpal etip otyrǵan Qorǵanys mınıstriniń orynbasary Imanjúsip Aqpanbaev pen Qorǵanys mınıstrligi áskerı bilim men ǵylym departamentiniń basshysy Edil Orazovqa alǵys bildirdi.
