B.Jumaǵulov: Taıaý eki-úsh jyldyń ishinde ulttyq ýnıversıtetterdiń shekti bally ózgermeıdi

Bul pikirdi búgin Úkimet otyrysynan keıin BAQ ókilderiniń saýalyna oraı jaýap bergen QR Bilim jáne ǵylym mınıstri Baqytjan Jumaǵulov bildirdi.

«Ótken jylǵy emtıhannyń qorytyndysyna sáıkes biz ulttyq ýnıversıtetterdegi shekti balldy 70-ke deıin kóterdik. Bul óte durys dep oılaımyn. Nege deseńizder, ulttyq ýnıversıtetke túsip jatqan balalardyń balldary 80-nen joǵary bolyp otyr», - dedi ol.

Onyń atap ótýinshe, shekti 70 ball elimizdegi ulttyq ýnıversıtetterge qatysty ǵana qoldanylady. Olardyń sany Qazaqstanda - 9. Al qalǵan ýnıversıtetterdiń shekti bally 60-ty quraıtyn bolady.

Sondaı-aq jýrnalısterdiń shekti ball kelesi jyly da kóterilýi múmkin be degen saýalyna jaýap bergen mınıstr: «Úzdiksiz kóterýge bola bermeıdi ǵoı. Biz ońtaıly ball 70 dep sanadyq jáne onyń ulǵaıýy taıaý eki-úsh jyldyń ishinde bolmaıdy», - dedi.