B. Jumaǵulov: Pedagogter daıarlaıtyn oqý oryndaryna talap barynsha kúsheıtiledi

Bul týraly búgin Májilistegi Úkimet saǵatynda Bilim jáne ǵylym mınıstri Baqytjan Jumaǵulov málim etti.

«Qazirdiń ózinde elimizdegi 89 joǵarǵy oqý ornynyń 43-ine ǵana pedagogıkalyq mamandyq boıynsha kadrlar daıarlaýǵa ruqsat berdik. Qalǵan 46-syna pedogog mamandar daıarlaı almaıtyndyǵy boıynsha sheshim qabyldap, olarǵa tyıym saldyq. «Bolashaq» halyqaralyq baǵdarlamasynyń sheńberinde jańa formatsııadaǵy pedagogter daıarlaý jáne olardyń biliktiligin arttyrý bastaldy. Pedagog mamandyǵyna beriletin memlekettik grant kólemi kóbeıdi», - deıdi mınıstr B. Jumaǵulov. Onyń aıtýynsha, atalǵan sharalar muǵalim kásibiniń tartymdylyǵyn arttyryp, pedagog mamandyǵyn naǵyz talantty jastardyń tańdaýyna múmkindik beredi.

Budan bólek, mınıstrdiń aıtýynsha, qazirgi tańda muǵalimder biliktilikti arttyrýdyń jańa júıesi engizile bastady. Bul úshin Nazarbaev Zııatkerlik mektepteriniń janynan Pedagogıkalyq sheberlik ortalyǵy, Pedagogterdiń biliktiligin arttyrý ortalyǵy qurylýda.

«Bul ortalyqtarda muǵalimder álemdik tájirıbege saı ázirlengen jańa baǵdarlamalar boıynsha arnaıy úsh aılyq qaıta daıarlaýdan ótedi. Mundaı qaıta daıarlaýmen 5 jylda 120 myńnan astam muǵalim, ıaǵnı muǵalimder korpýsynyń teń jartysyna jýyǵy ótedi», - deıdi vedomstvo basshysy.