B. Jumaǵulov: Pedagog mártebesin arttyrý - basym baǵyttardyń biri
ASTANA. 23 mamyr. QazAqparat /Qanat Mámetqazyuly/ - Aldaǵy ýaqytta da bilim salasyndaǵy basym baǵyttardyń biri - pedagog mártebesin arttyrý bolyp qala beredi. Bul týraly búgin QR Parlamenti Májilisinde ótken Úkimet saǵatynda Bilim jáne ǵylym mınıstri Baqytjan Jumaǵulov málim etti.
«Muǵalimniń joǵary biliktiligi - adamı kapıtal damýynyń negizi bolady. Memleket muǵalimniń mártebesin arttyrýda mańyzdy qadam jasap keledi. Atap aıtqanda, eń aldymen eńbekaqyny kóterý sharasy qolǵa alynýda. Máselen, aǵymdaǵy jyly barlyq bıýdjettik qyzmetkerler úshin jalaqyny 30 paıyzǵa arttyrýdan basqa pedagogter úshin qosymsha ústemaqy qarastyrylyp otyr. 1 qyrkúıekten bastap muǵalimder men óndiristik oqytý sheberleri biliktilik sanaty úshin bazalyq laýazymdyq jalaqydan 100 paıyzǵa deıin qosymsha tólemaqy alady», - dedi B. Jumaǵulov.
Onyń aıtýynsha, bul maqsattarǵa bıýdjetten 5,3 mlrd. teńge qarastyrylǵan. Sonymen qatar, mınıstr muǵalimniń qoǵamdyq ımıdjin arttyrý máselesi de qarastyrylyp jatqanyn jetkizdi. «Mınıstrlik osy jumystyń respýblıkalyq deńgeıdegi tujyrymdamasyn ázirledi», - dedi B. Jumaǵulov.
