B. Jumaǵulov elimizdiń aǵa-býyn jáne jas ǵalymdaryn merekemen quttyqtap, marapattady
ASTANA. 12 sáýir. QazAqparat - Búgin Qazaqstannyń ǵylymı qoǵamdastyǵy Ǵylym qyzmetkerleri kúnin atap ótýde.
Soǵan oraı, L.Gýmılev atyndaǵy Eýrazııa ulttyq ýnıversıtetinde Ǵylym qyzmetkerleriniń kúnine arnalǵan saltanatty jıyn ótti. Sondaı-aq Qazaqstannyń jetekshi ǵalymdaryn marapattaý rásimi boldy. QR Bilim jáne ǵylym mınıstrliginiń marapatyna elimizdiń kórnekti ǵalymdary ǵana emes, talantty jas ǵalymdar da ıe boldy. QR Bilim jáne ǵylym mınıstri Baqytjan Jumaǵulov otandyq ǵylym salasynyń mamandaryn tól merekelerimen quttyqtap, olarǵa shyǵarmashylyq tabys pen jetistikter tiledi.
«Rasynda da, Qazaqstannyń ǵylymı áleýeti árqashan joǵary deńgeıde boldy. Biz iri ǵalymdarymyzben maqtanamyz. Táýelsizdik jyldarynda otandyq ǵylym halyqaralyq deńgeıde matematıka, bıotehnologııa, fıtohımııa, nanotehnologııa, metallýrgııa jáne basqa salalar boıynsha úlken nátıjelerge qol jetkizdi», - dedi mınıstr quttyqtaý sózinde.
Mınıstrdiń aıtýynsha, qazirgi tańda Qazaqstanda 412 ǵylymı uıym jumys jasap otyr, onda 18 myńnan astam ǵylymı qyzmetker jumys isteıdi.
«Elbasynyń qoldaýymen ǵylymdy qarjylandyrý úzdiksiz ósip keledi. 2011 jyly ǵylymdy qarjylandyrý kólemi 26,8 mlrd. teńge bolsa, 2012 jylǵa 49,7 mlrd. teńge bólindi. Bul 61 paıyzǵa ósti degen sóz. 2015 jylǵa qaraı ǵylymǵa ketetin shyǵystar Іshki jalpy ónimniń 1 paıyzyn qurasa, 2020 jyly 1,5 paıyzǵa jetedi», - dedi B. Jumaǵulov.
