B.Jumaǵulov: Búgingi kúnniń basty maqsaty - barynsha tarıhı ádildik ornatý
ASTANA. 1 maýsym. QazAqparat - Búgingi kúnniń basty maqsaty - barynsha tarıhı ádildik ornatý. Búgin elordada ótip jatqan «Qazaqstandaǵy asharshylyq: halyq tragedııasy jáne tarıh sabaqtary» halyqaralyq ǵylymı-tájirıbelik konferentsııa barysynda QR Bilim jáne ǵylym mınıstri Baqytjan Jumaǵulov osylaı dedi.
Bul konferentsııanyń qoǵam úshin, bolashaq úshin jáne búgingi urpaq shyndyqty bilip, ótken tarıhymyzdan sabaq alýy úshin mańyzy óte zor ekendigin basa aıtqan mınıstr: «Osydan 80 jyl buryn Keńes odaǵy halyqtarynyń tartqan taýqymeti az emes. Jappaı ujymdastyrý kezindegi asyra silteý zor náýbetke ákep soqty. Ásirese, Soltústik Qazaqstan, Kavkaz, Ýkraına, Ońtústik Oral turǵyndary zardap shekti. Qazaqstan halqy buryn-sońdy kórmegen qıyndyqqa, qonys aýdarýǵa, ashtyqqa ushyrady. Ashtyqtan Qazaqstannyń barlyq etnostary, ásirese jergilikti halyq - qazaqtar zardap shekti», - dedi.
Sondaı-aq ol Keńes úkimeti kezinde tarıhtyń qaıǵyly bul betterin tereń zertteýge tyıym salynǵandyǵyn basa aıtty. Alaıda sol kezdiń ózinde totalıtarlyq rejimdegi tarıhtyń aqtańdaqtaryn birtindep qalpyna keltirgen ǵalymdardyń da bolǵandyǵyn atap ótip, olardyń eńbekteriniń joǵary baǵalanatyndyǵyn jetkizdi. «Búgingi kúnniń basty maqsaty - barynsha tarıhı ádildik ornatý. Bolyp ketken oqıǵalardy, tarıhymyzdy umytpaı, jastarǵa, bolashaq urpaqqa jetkizý», - dedi B.Jumaǵulov.
