B. Jumaǵulov Astanadaǵy Mendeleev olımpıadasyn joǵary deńgeıde ótkizýge tapsyrma berdi
ASTANA. 13 sáýir. QazAqparat - Búgin QR Bilim jáne ǵylym mınıstri Baqytjan Jumaǵulov Astanada ótetin hımııa páninen halyqaralyq Mendeleev olımpıadasynyń daıyndyǵyn tekserdi.
Vedomstvo qabyrǵasynda ótken uıymdastyrý komıtetiniń otyrysynda hımııalyq-laborotorlyq bazany qamdaý, qonaq úıler men joǵary jyldamdyqtaǵy ınternet jelisimen qamtamasyz etý jaıy pysyqtaldy. Sondaı-aq qonaqtardy Astana jáne Býrabaı kýrorty aımaǵynda ekskýrsııalar uıymdastyrý máseleleri taǵy bir ret úılestirildi. QR Іshki ister vıtse-mınıstri Marat Demeýovtiń aıtýynsha, meımandardyń qaýipsizdigin qamtamasyz etýge Astana jáne Aqmola oblysynyń 360-qa jýyq polıtseıi tartylatyn bolady.
Mınıstr olımpıadanyń uıymdastyrylý barysyna kóńili tolatyndyǵyn jetkizdi jáne óziniń komandasyna atalmysh sharanyń daıyndyǵyn odan ári tııanaqtaýǵa tapsyrma berdi.
«Bul olımpıadanyń basty ereksheligi buryn-sońdy qatyspaǵan Vengrııa, Grýzııa, Estonııa, Lıtva, Indonezııa, Germanııa jáne Frantsııa oqýshylary men jas hımıkteriniń quramalary keledi. Negizinen bilim jarysyna TMD elderiniń, Ońtústik-Shyǵys Azııa, Baltyq jaǵalaýy memleketteriniń oqýshylary dástúrli túrde qatysyp otyrady. Bıyl olımpıadaǵa qatysý úshin 120 bala Astanaǵa at basyn tireıdi dep kútilýde», - deıdi Respýblıkalyq «Daryn» ǵylymı-tájirıbelik ortalyqtyń dırektory Sholpan Qırabaeva.
Hımııa páninen Halyqaralyq Mendeleev olımpıadasy 1956 jyldan beri úzbeı jalǵasyp kele jatqan dástúrli shara. Olımpıada Astana qalasynda alǵash ret ótýde. Al osydan 10 jyl buryn Almatyda QazUÝ-niń bazasynda uıymdastyrylǵan bolatyn. Ataýly shara QR Bilim jáne ǵylym mınıstrliginiń Hımııa men bıologııanyń 1-quryltaıy qarsańynda ótip jatqandyǵyn aıta ketken jón.
«Búgingi tańda Qazaqstannyń brendine aınalǵan Nazarbaev ýnıversıtetiniń bazasynda ótetin tájirıbelik synaqtarǵa qajetti hımııalyq qural-jabdyqtar satyp alyndy. Qazaqstan quramasynyń quramyna eldiń ár aımaqtarynan suryptalǵan 15 oqýshy kiredi. Olardyń barlyǵy hımııa olımpıadalarynda birneshe ret júlde alǵan jas hımıkter», - dep atap ótti ol.
