B. Jumaǵulov: 12 jyldyq mektepke kóshýge oraı beıimdelgen 521 jańa mektep salynady
ASTANA. 18 maýsym. QazAqparat -12 jyldyq bilim berýge kóshýge daıyndyq barysyndaǵy aıtýly jańalyq - jańa standarttarǵa beıimdelgen mektepter qurylysynyń baǵdarlamasynyń júzege asa bastaýy.
Bul úshin taıaý jyldary 521 jańa mektep salý josparlanǵan. Búgin Májilistegi Úkimet saǵatynda Bilim jáne ǵylym mınıstri Baqytjan Jumaǵulov osylaı málim etti.
Mınıstr sóz arasynda 12 jyldyq oqytýdy engizýge daıyndyq jalǵasyp jatqanyn, ol boıynsha oqý-ádistemelik quraldary men oqytý mazmuny qaıta qaralyp jatqanyn atap ótti.
«Jalpy 12 jyldyq bilim berýge kóshý boıynsha eksperımentke qazirgi kezde 104 mektep qatysady. Oqý josparlary men baǵdarlamalary ázirlendi, bastaýysh synyptar úshin 164 oqýlyq jáne 426 oqý ádistemelik keshen, negizgi mektep úshin 34 oqýlyq jáne 82 oqý-ádistemelik keshen daıyndaldy», - deıdi mınıstr.
Onyń aıtýynsha, qazirgi kúni 12 jyldyq bilim berýge kóshýge daıyndyq barysynda beıimdelgen mektepter qurylysy iske asa bastady. Bul úshin taıaý jyldary 521 jańa mektep salý josparlanǵan.
«Salystyrý úshin aıta keteıin, mysaly Qazaqstanǵa qaraǵanda turǵyn halqynyń sany 10 esege kóp Reseıde osy jyldary 670 mekteptiń qurylysy kózdelýde. Osyǵan qaraǵanda bizdiń qarqynymyz áldeqaıda joǵary», - dedi B. Jumaǵulov.
