B.Jámishev: Zeınetaqy qoryndaǵy qarajat ınvestıtsııalanbasa, eshqandaı ósim bolmaıdy
Onyń aıtýynsha, bank zeınetaqy qoryndaǵy halyq aqshasynyń bir bóligi esebinen eksporttyq jobalardy qarjylandyrýdy kózdeýde. Bul óz kezeginde ulttyq ekonomıkany saýyqtyrýǵa yqpal jasaıdy.
«Jyl basynda Ulttyq qordan 35 mlrd. teńge eksporttaýshylardy qoldaýǵa bólingen bolatyn. Bul baǵdarlama, bizdiń oıymyzsha, edáýir tıimdiligin kórsetti. Osy baǵdarlamanyń júzege asyrylýy odan ári jalǵastyrylady dep josparlanýda. Degenmen ol Ulttyq qor qarajaty esebinen bolmaýy tıis. Qarjyny naryqtan tartýymyz kerek. Bizdiń oblıgatsııalardy alýǵa qaýqarly negizgi qarajat kózi ol - biryńǵaı jınaqtaýshy zeınetaqy qory ǵana ekenin aıta ketken jón. Osy baǵytta másele qaralýda», - dedi ol.
Sonyń qatar B.Jámishev el arasynda biryńǵaı jınaqtaýshy zeınetaqy qorynyń qarajaty jumsalyp ketedi dep áýre-sarsańǵa túsken halyqty alańdamaýǵa shaqyrdy. Sebebi qarajat edáýir senimdi ulttyq oblıgatsııalardy satyp alýǵa ǵana jumsalady.
«BJZQ qarajatyn paıdalaný máselesine toqtalatyn bolsaq, oǵan alańdaýshylyq tanytyp jatqandar kóp. Shynyna kelgende, BJZQ qarajattary ınvestıtsııalanbasa, ósim bolmaıdy. Olar ınvestıtsııalanýy kerek. Investıtsııalyq portfelderdiń qurylymy retteýshi organmen belgilenedi, onyń meılinshe qaýipsiz bolýyn qadaǵalaıdy. Negizinen olar memlekettiń baǵaly qaǵazdaryna, Qarjy mınıstrliginiń qaǵazdaryna baǵyttalady. Bir bóligi eń senimdi sheteldik ulttyq qaǵazdarǵa bólinedi. Sonymen qatar bir bóligi ulttyq emıtetterge baǵyttalatyny sózsiz. Olar kez kelgenine emes, joǵary reıtıngke ıe emıtetter tańdalady. «Qazaqstan damý bankiniń» reıtıngisi óte joǵary. Sondyqtan senimdi aryzger dep sanalady. Sondyqtan eger BJZQ qarajattary esebinen oblıgatsııalardy ornalastyrý múmkin bolsa, biz ol múmkindikti paıdalanamyz. Qazir somanyń kólemi talqylanýda. Aldyn ala boljaǵym kelmes edi», - dep atap ótti bank basshysy.