B. Ystybaev: «Qazaqstan barysyn» qoıyp, endi «Álem barysyna» daıyndalamyn
ASTANA. QazAqparat - Beıbit Ystybaev endigi kúni «Qazaqstan barysyn» qoıyp, «Álem barysyna» barynsha daıyndalmaqshy. Bul týraly búgin Ortalyq kommýnıkatsııalar qyzmetinde «Qazaqstan Barysy-2016» respýblıkalyq týrnıriniń qorytyndysyna arnalǵan brıfıngte «Qazaqstan Barysy-2016» týrnıriniń jeńimpazy osylaı málim etti.
«Osy joly týrnırden soń «Qazaqstan barysynan» ketetin shyǵarmyn dep aıtqan bolatynmyn, biraq áli ol týraly túpkilikti sheshim qabyldaǵan emespin. Degenmen, aldaǵy ýaqytta «Qazaqstan barysy» týrnırine kúrespeýim múmkin, degenmen «Álem barysyna» qaptyssam degen oıdamyn», - dedi B. Ystybaev.
Onyń aıtýynsha, kelesi jyly «Álem barysy» ótedi.
«Buǵan deıingi «Álem barysyn» Kýba balýany alyp ketken bolatyn. Sol áli esimnen ketpeıdi. Ketken eseni qaıtarsam ba dep oılaımyn. Tek soǵan ǵana jumys istegendi jón sanap júrmin. Sondyqtan da, sońǵy eki-úsh jylda negizinen osy baǵytta jumys istep jatyrmyn. «Qazaqstan barysy» sekildi týrnırlerde ózimdi soǵan daıyndyq retinde synap kelemin. Meniń basty maqsatym - osy», - dedi B. Ystybaev.
Eske salsaq, jaqynda Astanada ótken altynshy «Qazaqstan Barysy-2016» respýblıkalyq týrnıriniń jeńimpazy Beıbit Ystybaev atanǵan bolatyn. Beıbit Ystybaev osyǵan deıin 2012 jáne 2015 jyly «Qazaqstan Barysy» ataǵyna qol jetkizgen edi. Týrnır jeńimpazy B. Ystybaevqa 25 000 000 teńge, altyn taıtuıaq jáne Astanadan bir bólmeli páter berildi. Ekinshi oryn alǵan Jumanazar Ersultanovqa 5 500 000 teńge, úshinshi oryn alǵan Aıbol Aıtbekke 1 800 000 teńge kóleminde syılyq tabystaldy.
