B.Tólegenovanyń 7-shi halyqaralyq vokalshylar baıqaýyna qatysýshylardyń qaı retpen óner kórsetetini belgili boldy (FOTO)
ASTANA. QazAqparat - Búgin elordada Bıbigúl Tólegenovanyń 7-shi halyqaralyq vokalshylar baıqaýyna qatysýshylar arasynda jerebe tastalyp, olardyń qaı retpen óner kórsetetini belgili boldy. Sharaǵa B.Tólegenovanyń ózi arnaıy kelip qatysty.
«Erteń bizdiń 7-shi konkýrsymyz bastalady. Biz 2001 jyldan bastap jumys istep kelemiz. Qudaıǵa shúkir, qazirgi ýaqytta bizdiń baıqaýǵa qatysýshylar, laýreattar TMD-ny qospaǵanda Frantsııada, Avstrııada , jalpy búkil álemde óner kórsetýde. Biz bul baıqaýymyzben, laýreattarymyzben maqtanamyz»,- dedi B.Tólegenova.
Uıymdastyrýshylardyń atap ótýinshe, baıqaýǵa Qyrǵyzstan, Ózbekstan, Ýkraına, Armenııa, Bashqurtstan, Tatarstan, Lıtva, Reseı, Mońǵolııa, Bolgarııa jáne Qazaqstannan 64 ánshi qatysady. Tórt bólimnen turatyn baıqaýdyń fınaldyq týryna tek 14 ánshi ǵana joldama alady.
Baıqaý qazylar alqasynyń tóraıymy KSRO-nyń halyq ártisi, KSRO men Qazaqstannyń Memlekettik syılyǵynyń ıegeri Bıbigúl Tólegenovanyń ózi bolady. Sondaı-aq ánshilerdiń ónerin Lıtvanyń halyq ártisi Vladımıras Prýdnıkovas, Reseıdiń halyq ártisi Tamara Novıchenko, KSRO-nyń halyq ártisi Mıhaıl Mýntıan, halyqaralyq baıqaýlardyń laýreaty bolgarııalyq Orlın Goranov, Armenııanyń eńbek sińirgen qaıratkeri Sýsanna Martırosıan, parıjdegi Reseı mýzykalyq qoǵamynyń tóraǵasy, Graf Sheremetev baǵalaıdy.
