B.Sultanov: Kvazımemlekettik sektor qaryzdaryn basqarýdyń jańa tujyrymdamasy ázirlenedi
ASTANA. QazAqparat - Kvazımemlekettik sektor qaryzdaryn basqarýdyń jańa tujyrymdamasy ázirlenedi. Bul týraly búgin QR Úkimet otyrysynda elimizdiń Qarjy mınıstri Baqyt Sultanov málim etti.
«Qarjy sektoryn turaqtandyrý» bóliginde Qarjy mınıstrligine kvazımemlekettik sektordyń shetel valıýtasynda zaım alýyna shekteý boıynsha tarmaq bekitilgen. Qazirgi zamanaýı ekonomıkalyq shynaıy jaǵdaıda memlekettik jáne kvazımemlekettik sektor qaryzyn baqylaý qajettigi týyndaýda», - dedi ol.
B.Sultanovtyń atap ótýinshe, joǵary qaryz júktemesinen jáne soǵan sáıkes kredıttik reıtıngterdiń tómendeý táýekeliniń artýynan jaltarý úshin ekonomıkalyq tıimdilik bermeıtin jobalarǵa zaım tartýdy shekteý qajet. Al ulttyq kompanııalardyń zaım tartý baǵdarlamasy Úkimettiń memlekettik qaryzdardy basqarý jónindegi jalpy saıasatymen naqty baılanysta bolý tıis.
«Osyǵan baılanysty taıaý aralyqta Qarjy mınıstrligi Ulttyq ekonomıka mınıstrligimen birlesip, kvazımemlekettik sektordyń qaryzdaryn basqarýdyń jańa tujyrymdamasyn ázirleıtin bolady. Ol, bir jaǵynan qaryzdy qaýipsiz deńgeıde ustaýǵa múmkindik beredi», - dedi mınıstr.
Onyń atap ótýinshe, ekinshi jaǵynan halyqaralyq qarjy naryǵyndaǵy shoǵyrlandyrylǵan ári úılestirilgen jumystar «Nurly jol» syndy mańyzdy ulttyq josparlardy barynsha tıimdi ártaraptandyrýǵa múmkindik beredi.
