B. Smaǵul: Sırııaǵa attanǵan qazaqstandyqtar ulttyq qaýipsizdikke tóngen qaýipti bildiredi
«Sońǵy kezderi el azamattary úlken radıkaldy baǵytpen qarýlanǵan toptardyń eksperımentine aınalyp, olarǵa azyq retinde paıdalanylyp ketip jatqany qatty oılandyrady. Qazirgi bir-birimen tyǵyz baılanysqan álemde terrorızm qaýpi shekara uǵymyn joıdy. Qaı qurlyqta bolmasyn terrorızmnen tónetin qaýip álemdik beıbitshilikke birdeı áser etedi. Osy tusta 15 qazan kúni frantsýz baspasózinde «Qazaqstannan 150 adam Sırııadaǵy qasıetti djıhadqa qosyldy» degen maqala kóp adamdy alańdatqany málim. Atalmysh geosaıası qaqtyǵysta beıbitshilik pen birlikti tý etken bizdiń elden top adamdardyń qatysýy elimizdegi radıkaldy dinı tarmaqtardyń áli de belsendi jumys istep jatqanynyń kórinisi dep qabyldamaı, ulttyq qaýipsizdikke tóngen qaýip dep baǵalaǵan oryndy bolar», - dedi saýaly barysynda depýtat Baqytbek Smaǵul.
Onyń aıtýynsha, atalǵan másele Qazaqstannyń aýmaǵynda óz elin týǵan Otany emes, bolashaq ıslam halıfatynyń bir bóligi retinde qarastyratyn toptardyń da belsendi áreket jasap jatqanyn kórsetedi. «Bul tusta elimizdiń kóp bóligindegi belsendi qyzmet etip jatqan Din isteri agenttigi men basqa da memlekettik organdardyń jumysyn joqqa shyǵara almaımyz, olardyń qyzmeti qýantady. Alaıda, bul úlken teńizge tamǵan tamshy ispettes. El jastaryn durys jolda tárbıeleýge bir ǵana memlekettik organ emes, bútkil memlekettik apparat atsalysýy qajet», - deıdi depýtat.
Sonymen qatar, saýalyn sabaqtaı kele depýtat Sırııaǵa ketken qazaqstandyqtar týraly aqparattyń mán-jaıyn anyq bilgisi keletinin alǵa tartty. «Bul aqparat shyndyqqa janasa ma? Bul shyndyqqa janassa, bizdiń elde bolashaq soǵys oshaqtaryna áli de qanshama jastardyń tárbıelenip jatqanyn kórsete me? Bul sizderdiń taraptaryńyzdan qalaı baǵalanýda? Elimizde Taıaý Shyǵys elderinde bilim alǵan jastardyń qaı salada jumys atqarǵany, qandaı bilimniń ıesi ekendigi tekserilip jatyr ma? Din isteri agenttigi meshitterdegi jastardyń qandaı ıdeologııada tárbıelenip jatqandyǵyn qarastyra ma? Qanshama otbasy búlinip, qanshama bilimdi jastar ekstremıstik toptarǵa ótip jatyr. Endeshe jastarmen dinı taqyryptaǵy yqpaldastyq joly qalaı órbýde?» - dedi Úkimet pen Bas prokýror atyna qaratyp joldaǵan saýalynda Baqytbek Smaǵul. Saýalǵa májilistiń bir top depýtattary qol qoıǵan.
Esterińizge sala keteıik, qazan aıynyń basynda 150 qazaqstandyqtyń djıhad jarııalap, Sırııadaǵy qarýly qaqtyǵysqa attanǵany týraly aqparat áleýmettik jelilerde tarap, youtube arqyly olar jaıynda beınerolıkter de paıda bolǵan edi.