B. Shúkenovti eske alýǵa arnalǵan «Otan-Ana» respýblıkalyq ánshiler baıqaýy ótedi
ALMATY. QazAqparat - Erteń Qyzylordada ánshi-kompozıtor Batyrhan Shúkenovti eske alýǵa arnalǵan tuńǵysh «Otan-Ana» respýblıkalyq ánshiler baıqaýy ótedi. Estrada janryndaǵy án dodasyn ótkizýge Qyzylorda oblystyq ákimdigi muryndyq boldy.
Baıqaýǵa elimizdiń túkpir-túkpirinen 18-30 jas aralyǵyndaǵy 27 ánshi qatysady.
27 ánshi baıqaýdyń birinshi kezeńinde erkin taqyrypta án salsa, ekinshi kezeńde Batyrhan Shúkenov repertýarynan mindetti bir ándi oryndaıdy.
«Batyrhan Shúkenov tanymal mýzykant, ánshi-kompozıtor, Qazaqstan jáne Reseı estradasynda ózindik ornyn qalyptastyryp ketken talant ıesi. Ol el esinde óziniń jarqyn júzimen, júrek tebirenter ánderimen qaldy. Saksofonda oınap, prodıýserlik qyrymen de tanyldy. Onyń qaıtalanbas talanty talaı jasqa úlgi boldy. Sondyqtan da, ónerge qushtar jastarǵa kómektesý maqsatynda Batyrhan Shúkenov atyndaǵy baıqaýdy uıymdastyrýdy qolǵa aldy», - dedi Qyzylorda oblystyq ákimdigi.
Baıqaýdyń basty ereksheligi ánshilerge mınýsovkada bek-vokaldy qoldanýǵa ruqsat berilmeıdi. Baıqaýdan tys, ónerpazdar tal otyrǵyzyp, qalany kógaldandyrý jumystaryna atsalysady.
