B. Saparbaev jastar arasynda beleń alǵan sýıtsıdke alańdaýshylyq bildirdi
ASTANA. QazAqparat - Tek byltyrǵy jyldyń ózinde 900-ge jýyq ózine-ózi qol jumsaý oqıǵasy tirkeldi. Bul týraly búgin L. Gýmılev atyndaǵy Eýrazııa Ulttyq ýnıversıtetinde ótken «Elbasymen birge jastardyń qadamy» forýmynda QR Premer-Mınıstriniń orynbasary Berdibek Saparbaev málim etti.
«Tek byltyrǵy jyldyń ózinde 900-ge jýyq ózine-ózi qol jumsaý oqıǵasy tirkeldi. Onyń árbir úshinshisi jastar arasynda oryn alǵan. Bul ne sumdyq? Mektepter qaıda qarap otyr? Bılik nege shara qoldanbaıdy? Qoldansa, nátıjesi qaıda? Ata-analar komıtetteri qaıda? Mektep dırektorlary nege olarmen jumys jasamaıdy? Meniń bilýimshe, búginde 2070 mektepte mektep ınspektorlary bar. Kún aralap sýıtsıd bolyp jatsa, olar ne istep júr? », - dedi B.Saparbaev.
Onyń pikirinshe, mundaı jaǵdaılardy boldyrmaý úshin balalarmen jumysty jaqsartý qajet. Jáne de báleniń bárin UBT-ǵa jaba salýǵa bolmaıdy.
Búginde ózine-ózi qol jumsaý oqıǵalary Qostanaı, Almaty, Shyǵys Qazaqstan, Ońtústik Qazaqstan oblystarynda keń etek jaıyp tur.
«Bundaı jaǵdaıdy boldyrmaý úshin Bilim jáne ǵylym mınıstrligi Qorǵanys mınıstrligimen, Mádenıet jáne sport mınıstrligimen jáne basqa da vedomstvolarmen qoıan-qoltyq jumys isteý kerek», - dep atap ótti vıtse-premer.
