B.Saparbaev metsenattardy Qazaqstannyń bedelin shetelde arttyrýǵa shaqyrdy
Búgin «Máńgilik el - eldiń biriktirýshi kúshi» atty forýmda vıtse-premer aldymen eldegi zııaly qaýymnyń aldynda turǵan mindetterdi ashyq aıtty.
«Qazirgi tańda mádenıet pen óner qyzmetkerleriniń aldynda birqatar máseler tur. Bul eń birinshiden, patrıottyq rýhtaǵy ıdeologııalyq týyndylardy dúnıege ákelý. Ózderińiz bilesizder, kezinde jazýshylar men óner adamdary bılik pen qoǵam arasyndaǵy kópir bolǵan. Shyǵarmashylyq odaqtar ıdeologııalyq qalyptastyrýshy uıym bolǵan. Ókinishke oraı, sońǵy jyldary bul jumystar aqsap qaldy. Sondyqtan zııaly qaýymnyń eń negizgi mindetteriniń biri - burynǵy dástúrimizdiń bárin qalpyna keltirý jáne egemendigimizdi eskere kele, ary qaraı damytý», - dedi ol.
«Taǵy bir másele - Qazaqstandy shet elge tanystyrý. Biz egemendi el bolǵannan keıin, memleketimizdiń ataq-abroıy óz óńirimizde ǵana emes, dúnıejúzine tanylýy kerek. Keıingi ýaqytta damý bar. Bir ǵana Abaıdy alatyn bolsaq, Máskeýde, Beıjińde, Býhareste Abaıǵa eskertkishter ornatyldy. Bul baǵyttaǵy jumystardy jalǵastyrý kerek. Dramatýrg Dýlat Isbaekov, sýretshi Erbolat Tólepbaev, Eńbek eri Aıman Musaqojaeva, «Astana Opera» sııaqty óner uıymdary Qazaqstandy shetelge tanytyp júr. Biraq bul az, sanyn kóbeıtý kerek. Qazirgi zamanda jaqsy bir syltaý bar, ásirese, basshylarda, «aqsha joq» degen. Aqshany tabý kerek. Onyń kózin bilý kerek. Qudaıǵa shúkir deý kerek, aramyzda biraz metsanattar bar. Solarmen jumys istesek, shet elde Qazaqstannyń abyroıyn, bedelin arttyrýǵa bolady. Onyń ústine ıÝNESKO men sheteldegi Qazaqstannyń elshilikterimen birge jumys isteý kerek», - dep atap ótti B.Saparbaev.
Onyń oıynsha, bilim salasyndaǵy zııaly qaýym úsh tuǵyrly tildiń damýyna úles qosýlary shart.
«Elbasynyń árdaıym aıtatyny - úsh tildilik. Damyǵan memleket bolamyz desek, úsh tildi damytýymyz kerek. Ol úshin qazir barlyq jaǵdaı jasalǵan. Sol múmkindikterdi paıdalanýymyz kerek», - dedi B.Saparbaev.
Aıta keteıik, «Máńgilik el - eldiń biriktirýshi kúshi» atty Qazaqstannyń shyǵarmashylyq zııaly qaýymy forýmyna respýblıkanyń túkpir-túkpirinen 200-ge jýyq zııaly qaýym ókili keldi. Olardyń ishinde kórnekti mádenıet, óner, ǵylym, qaıratkerleri, jazýshylar, mádenıet, shyǵarmashylyq jáne bilim uıymdarynyń basshylary qatysty.
