B.Saparbaev: Qazaq qyzdarynyń tóbelesip, asylyp ólgenin qashan kórip edik?!
ASTANA. QazAqparat - Búgin Astanada ótip jatqan bilim berý júıesi qyzmetkerleriniń respýblıkalyq tamyz konferentsııasynda sóz alǵan Premer-Mınıstrdiń orynbasary Berdibek Saparbaev «qazir bala tárbıesine bilek sybana kirispesek, erteń eldigimizden aıyrylamyz»,- dep batyra aıtty.
"Balanyń damýyna múmkindik berip, qyzyqty úıirmelerine barý úshin qosymsha bilim berý baǵdarlamasyn damytý kerek. Qazir elimizde qosymsha bilim berý júıesine oqýshylardyń 25 paıyzy ǵana tartylǵan. Keıbir oblystarda, mysaly Almaty oblysynda oqýshylardyń 10 paıyzy, Ońtústik Qazaqstan oblysynda oqýshylardyń 14 paıyzy, Atyraý oblysynda oqýshylardyń 16 paıyzy ǵana qosymsha bilim, tárbıe berý júıesine tartylǵan. Sosyn kelip, sýıtsıd, zorlyq-zombylyq boldy deımiz... Eger balalarymyzdy sabaq bitkennen keıin qosymsha tárbıe, bilim berýge tartpasaq, bul jalǵasa beredi. Eger balanyń basqa tıimsiz istermen aınalysýyna ýaqyty qalmasa, osyndaı jaǵdaılar bolmaıtyn edi. Qazaq qyzdarynyń tóbeleskenin, qazaq qyzdarynyń asylyp ólip jatqanyn qashan kórip edik?! Bul - sońǵy ýaqytta tárbıeniń nasharlap ketkenin kórsetedi. Árıne, balanyń tárbıesine eń birinshiden jaýapty kisi - ata-anasy men otbasy. Biraq, bala tárbıesine kóńil bóletin memlekettik uıymdar bar jáne sol úshin memleketten aqsha alyp otyr. Meniń oıymsha, bul baǵytta bizde birikken jumys joq. Eger osyndaı másele boıynsha ishki ister organdarynan basqa, bilim beretin uıymdar, qoǵamdyq uıymdar birge jumys istese, jaǵdaı ózgerip, jańaǵy qaıǵyly jaǵdaılar bolmaıtyn edi. Sizderge aıtarym, bizdiń "Máńgilik el" bolýymyz, bolashaǵymyz - tárbıe men ulttyq dástúrimizge baılanysty. Eger bulardan aıyrylyp qalsaq, el bolmaımyz",-dedi B.Saparbaev.
