B.Saparbaev: Kásibı fýtbolymyz qaıda?
ASTANA. QazAqparat - Búgin Astanada Qazaqstannyń sport qaýymdastyǵynyń forýmynda QR Premer-Mınıstriniń orynbasary Berdibek Saparbaev elimizdiń kásibı fýtbolyna kóńil toq emes ekendigin jasyrmady.
Qazaqstan fýtbolynyń ardageri, Fýtbol federatsııasynyń burynǵy vıtse-prezıdenti Mıhaıl Gýrmanǵa qoıǵan saýalynda vıtse-premer: «Búginde fýtbol alańy joq eldi meken joq shyǵar. Kásipqoı fýtbolymyz qaıda? Jaqsy bapkerlerimiz qaıda ketken?», - dep saýal tastady. Mıhaıl Gýrman elde fýtboldyń damýyna úlken qoldaý jasalyp jatqandyǵyn aıtty, biraq kásibı fýtboldyń damýyna keri áser etip jatqan faktorlarǵa da toqtaldy. «Ókinishke oraı, bapkerlerde urpaq jalǵastyǵy degen joq. Keńes Odaǵy qulaǵan kezde kóptegen jaqsy bapkerler Reseıge, ózge de elderge qonys aýdaryp ketti. Olar ózderiniń izin basatyn eshkimdi qaldyrmady. Bizde bapkerlik quram jetkiliksiz», - dedi ol. M.Gýrmannyń sózine qaraǵanda, fýtboldyń aıaǵyna ınfraqurylymnyń nasharlyǵy tusaý salyp otyr. «Mine, jaqynda ǵana maýsym bastaldy. Oblystardyń barlyǵynda oınaý múmkin emes. Sebebi oǵan úsh myńdyq jabyq manejder qajet. Chempıonat naýryzda bastalsa, mamyrǵa deıin olar osyndaı manejderde oınaýlary shart. Olar eshqandaı aımaqta joq. Bizde qysta oınaýǵa bolatyn qaı jer bar? «Astana arena» men «Qaırat-Almaty». Kásibı fýtbolshylarǵa alań jetispeıdi», - deıdi M.Gýrman. Forýmǵa QR Mádenıet jáne sport, Bilim jáne ǵylym mınıstrlikteriniń ókilderi, qoǵam qaıratkerleri, sport ardagerleri, tanymal sportshylar, 2015 jylǵy Qysqy Ýnıversıadanyń jeńimpazdary qatysty.
