B.Saparbaev esh jerde esep bermeıtin rektorlardy synǵa aldy
ASTANA. QazAqparat - Bilim jáne ǵylym mınıstrliginen elimizdegi ulttyq joǵary oqý oryndarynyń 14 jylǵy jumysy boıynsha taldaý suradym. Osy ýaqyt ishinde eshteńe ózgermepti, - dep málim etti búgin bilim berý júıesi qyzmetkerleriniń respýblıkalyq tamyz konferentsııasynda Premer-Mınıstrdiń orynbasary Berdibek Saparbaev.
«Elimizde ulttyq mártebege ıe bolǵan joǵary oqý oryndarynyń aldy 14 jyldan beri jumys istep keledi. Qazir olardyń sany - 9. Men Bilim jáne ǵylym mınıstrliginen osy 14 jylda oqý oryndarynyń atqarǵan jumysy qandaı dep taldaý suradym. Biraq, osy ýaqyt ishinde eshnárse ózgermegen bolyp shyqty. Tipti keıbir ulttyq joǵary oqý oryndary óz kórsetkishteri boıynsha eldegi ózge oqý oryndarynan asa almaı jatyr»,-degen B.Saparbaev 14 jyl ishinde ulttyq ýnıversıtetterdi qarjylandyrý 14 esege artqanyn alǵa tartty.
«Osy 14 jylda ulttyq ýnıversıtetterdi qarjylandyrý 14 ese ósti, al ózge qarjy kózderinen tartylǵan qarajat úsh esege ǵana artqan. Olardyń negizgi mindeti jaqsy mamandar daıyndaý, ózge oqý oryndaryna engizý úshin jańa oqý baǵdarlamalaryn ázirleý, sonymen qatar bıýdjetten tys qosymsha qarjy tartý. Aslan Bákenuly (Aslan Sárinjipov - QR Bilim jáne ǵylym mınıstri), osy ulttyq joǵary oqý oryndarynyń qyzmeti baǵalanbaǵan, rektorlar esh jerde esep bermeıdi. Ulttyq oqý oryndary bolǵandyqtan, olar qoǵam aldynda esep berýi tıis»,-dedi osy máseleni qolǵa alýdy tapsyra otyryp B.Saparbaev.
