B.Saparbaev Astanadaǵy Shyǵys Qazaqstan oblysynyń jármeńkesin ashty
ASTANA. 21 jeltoqsan. QazAqparat - Shyǵys Qazaqstan oblysy Astanadaǵy jármeńkege jalpy salmaǵy 115 tonna azyq-túlik ónimderin jetkizdi. Bul týraly búgin jármeńkeniń ashylýynda ShQO ákimi Berdibek Saparbaev málim etti.
«Bizdiń Jańa jyldyń aldyndaǵy kelgen maqsatymyz aıazǵa, boranǵa qaramastan Astana qalasyna arzan baǵamen taǵam ónimderin usynyp, astanalyqtardyń kóńilderin kótersek degen nıet. Biz úshin 50 gradýs aıaz ben boran úırenshikti jaǵdaı, sondyqtan bizge eshqandaı aýa raıy kedergi bolmaıdy. Búgingi sharaǵa oblysymyzda shyǵyp jatqan ónimder ákelindi. Meniń oıymsha, bul osynda kelgen sharýa qojalyqtarynyń barshalaryna óz ónimderin ótkizýge úlken kómegin tıgizedi. Biz jármeńkege 115 tonna azyq-túlik ónimderin jetkizdik. Negizinen alyp kelgenimiz - halyq úshin qajetti, oblysta kóp shyǵaratyn ónimder», - dedi ol.
Aıta keteıik, Shyǵys Qazaqstan oblysy bıyl ekinshi ret osyndaı jármeńke uıymdastyrýda.
Atalmysh jármeńkege oblystyń eki qalasy men 16 aýdanynan Astanaǵa 30 tonnadan astam bal, 57 tonna iri qara men qoı eti, 2 tonna qus eti, 3 tonna sút ónimderi, 12 tonna ósimdik maıy, 6,5 tonna shujyq ónimderi, 6 tonnadan astam jarma túrleri, 4 tonnaǵa jýyq balyq, 6 tonna qymyz, 1,5 tonna panty ónimderi, 2 tonna nan-toqash, kondıterlik taǵamdar, un jóneltilgen. Orta eseppen alǵanda bizdiń qaladaǵy bazarlarmen salystyrǵanda ónimderi 20 paıyzǵa tómen.
