B.Saparbaev: 2017 jyly dýaldy júıemen bilim beretin kolledjder sanyn 50 paıyzǵa jetkizý qajet
ASTANA. QazAqparat - 2017 jyly dýaldy júıemen bilim beretin kolledjder sanyn 50 paıyzǵa jetkizý qajet. Bul týraly búgin «Kásiptik bilim jáne bıznes: áriptester suhbattastyǵy» atty 6-shy halyqaralyq forýmda QR Premer-Mınıstriniń orynbasary Berdibek Saparbaev aıtty.
--«Eń bastysy qazirgi ýaqytta biz ekonomıkamyzǵa qajetti, birinshi kezekte jumys berýshilerdiń talabyna saı keletin kadrlardy daıyndaýymyz qajet», - dedi ol.
Osy oraıda vıtse-premer Bilim jáne ǵylym mınıstrligi men Densaýlyq saqtaý jáne áleýmettik damý mınıstrligine taıaý aralyqtyń ishinde mamandyqtarǵa baılanysty kadr qajettiligin anyqtaýdy júktedi.
«Biz «Samuryq-Qazyna», «Qazaqstan temir joly», «Qazatomónerkásip», «Qazmyrysh», «Qazaqmys», «Pavlodar hımııa zaýyty» syndy iri ulttyq kompanııalarmen birlesip jumys isteýdemiz. Biraq olardyń qatary kóp emes. Sondyqtan da mınıstrlik Ulttyq kásipkerler palatasymen birlesip, kadrlardy daıyndaýǵa qatysty basqa da kásiporyndarmen jumysty jandandyrýy tıis», - dedi B.Saparbaev.
Sondaı-aq, Premer-Mınıstrdiń orynbasary Úkimet pen Ulttyq kásipkerler palatasy bilim berýdiń dýaldy júıesiniń jol kartasyn daıyndaǵanyn eske saldy.
«Mınıstrlik pen basqa da memlekettik organdarǵa 2017 jylǵa deıin osy júıemen jumys isteıtin kolledjderdiń sanyn 50 paıyzǵa deıin jetkizý mindeti júkteldi. Búginde bul júıemen 280 kolledj jumys isteıdi. Bul bizdiń respýblıkadaǵy barlyq kolledjder sanynyń shamamen 34 paıyzyn quraıdy», - dedi ol.
