B.Saǵyntaev Úkimet úıinde sý tasqynyna qatysty sharalar boıynsha keńes ótkizdi
ASTANA. QazAqparat - Búgin Úkimet úıinde QR Premer-mınıstriniń birinshi orynbasary Baqytjan Saǵyntaevtyń basshylyǵymen sý tasqynyna qatysty sharalar boıynsha keńes ótti.
Keńes jumysyna ortalyq memlekettik jáne jergilikti atqarýshy organdardyń ókilderi qatysty.
Búginde tasqyn jaǵdaıy Aqmola, Qostanaı, Pavlodar, Soltústik Qazaqstan oblystarynyń barlyq aýdandarynda, sondaı-aq Shyǵys Qazaqstan, Qaraǵandy, Aqtóbe oblystarynyń birqatar aýdandarynda saqtalyp otyr.
Tasqyn kezeńiniń keri zardaptaryn boldyrmaý úshin respýblıkanyń barlyq aımaqtarynda eskertý jáne qutqarýshy uıymdastyrýshylyq-tehnıkalyq sharalar ótkizilip jatyr.
Oblystarda sý tasqyndary kezeńinde 10,37 myń tonna janar-jaǵarmaı, 188 myń tonna ınerttik materıaldar, 1 mln. 84 myń qap, 89,4 tonna jarylǵysh zat daıyndaldy.
Eldi mekenderdi sý basý qaýpi bolǵan jaǵdaıda apattyq-qutqarý bólimsheleriniń jalpy sany 23972 adam, 7361 tehnıka birligi, júzý quraldarynyń 982 birligi jáne 16 tikushaqtan qurylǵan kúsh-qural toptary quryldy.
Keńes qorytyndylary boıynsha, B.Saǵyntaev oblystar, Astana jáne Almaty qalalarynyń ákimderine múddeli memlekettik organdarmen birlesip kún saıynǵy monıtorıngti júrgizýdi jáne atalǵan máseleni turaqty baqylaýǵa alýdy tapsyrdy, dep jazady primeminister.kz.
