B.Saǵyntaev sý tasqynyna baılanysty jaǵdaıdy turaqty baqylaýda ustaýdy tapsyrdy
ASTANA. QazAqparat - Búgin Úkimet úıinde QR Premer-Mınıstriniń birinshi ornybasary Baqytjan Saǵyntaevtyń tóraǵalyq etýimen óńirlerde oryn alǵan sý tasqyny máselesi jáne soǵan sáıkes qabyldanǵan sharalar boıynsha selektorlyq májilis ótti.
Bul týraly QR Premer-Mınıstriniń baspasóz qyzmetinen habarlady.
Májilis jumysyna ortalyq memlekettik jáne jergilikti atqarýshy organdar ókilderi qatysty.
Barlyq óńirlerde Den qoıý jospary ázirlenip, sý tasqyny kezeńindegi is-qımyl josparyna túzetýler engizildi. Ulttyq gvardııanyń 4515 qutqarýshylary, órt sóndirýshileri men áskerı qyzmetshileri, 1221 birlik arnaıy jáne qutqarý tehnıkasy, 74 júzý quraldary tartyldy, 106 sý aıdaıtyn qurylǵy iske qosyldy.
Sý tasqyny bastalǵan sátten bastap 12 shaqyrymǵa ýaqytsha damba salynyp, 3,2 shaqyrym bóget qalpyna keltirildi, 51 myńnan astam qum toltyrylǵan qap qoıyldy. 140,6 myń tekshe metr sý aıdaldy. Sý basýy múmkin eldi mekenderden aldyn ala 11 172 adam qaýipsiz jerge kóshirildi.
Óńirlerde den qoıý jumystary boıynsha avarııalyq-qutarý bólimsheleriniń kúshteri men quraldary quryldy: jalpy sany 23 972 adam, 7361 birlik tehnıka, 982 júzý quraldary, 16 tikushaq jumyldyryldy.
Jıyn qorytyndysy boıynsha Baqytjan Saǵyntaev oblystar, Astana men Almaty qalalarynyń ákimdikterine múddeli memlekettik organdarmen birlesip kúndelikti monıtorıng júrgizýdi, jaǵdaıdy turaqty baqylaýda ustaýdy, qalyptasqan jaǵdaıǵa jedel den qoıýdy tapsyrdy.
