B. Saǵyntaev óńirlerdiń ákimdikterine kún saıyn sý tasqyny jaǵdaıyna monıtorıng júrgizýdi tapsyrdy
ASTANA. QazAqparat - Búgin Úkimet úıinde QR Premer-Mınıstriniń Birinshi orynbasary Baqytjan Saǵyntaev ortalyq jáne jergilikti atqarýshy organdardyń 2016 jylǵy sý tasqyny kezeńine daıyndyǵy máselesi boıynsha selektorlyq keńes ótkizdi.
Bul týraly QR Premer-Mınıstriniń baspasóz qyzmeti habarlady.
Qazirgi ýaqytta respýblıkanyń sý qoımalary kóktemgi sý tasqynyn burýǵa syıymdylyq qoryna ıe. Sý tasqynynyń aldyn alý jáne onyń saldaryn joıý úshin JJM, ınertti materıaldar qorlary daıarlandy, eldi mekenderde qar shyǵarylyp jatyr.
Sý tasqynyn gıdrotehnıkalyq qurylys arqyly apatsyz ótkizý, ózen basseınderi ýchaskelerinde aldyn alý sharalaryn ótkizý maqsatynda sý tasqynyna qarsy sáıkes komıssııa quryldy.
Baqytjan Saǵyntaev Qaraǵandy, Aqmola jáne basqa da oblystar 2015 jyldyń naýryz-sáýirinde sý tasqynynan zardap shekkendegi oqıǵa qaıtalanbaý úshin barlyq qajetti sharalardy qabyldaý qajet ekenin basa aıtty.
Osyǵan baılanysty QR Premer-Mınıstriniń Birinshi orynbasary óńirlerdiń ákimdikterine ortalyq memlekettik organdarmen birge kún saıyn monıtorıng júrgizýdi jáne sý tasqyny jaǵdaıyn baqylaýdy, arnaıy jáne ınjenerlik tehnıkany sý tasqyny qaýpi bar jerlerge shoǵyrlandyrýdy, kópirlerdi, aryq-arna júıelerin, ózen arnalaryn, gıdrotehnıkalyq qurylystardy jáne qorǵaý bógetterin qar sýy men sý tasqynynyń úlken kólemin ótkizýge daıyndaýdy, eldi mekenderdi sý basý qaýpi týyndaǵan jaǵdaıda áreket etý erejeleri boıynsha halyqqa túsindirý jumystaryn júrgizýdi uıymdastyrýdy tapsyrdy.
