B. Saǵyntaev MÓZ qaıta jóndeý men jańǵyrtý jumystaryn kestege sáıkes aıaqtaýdy tapsyrdy

ASTANA. QazAqparat - Búgin Úkimet Úıinde QR Premer-Mınıstriniń birinshi orynbasary Baqytjan Saǵyntaev memlekettik organdar, «QazMunaıgaz» AQ, otandyq munaı óńdeýshi kásiporyndar basshylarynyń qatysýymen munaı óńdeýshi ónerkásipti damytý máseleleri boıynsha jıyn ótkizdi.

QR Premer-Mınıstriniń baspasóz qyzmeti habarlaǵandaı, májiliste ishki naryqty ashyq tústi munaı ónimderimen qamtamasyz etý máselelerin qarady, sondaı-aq Pavlodar munaıhımııalyq zaýyty, Atyraý, Shymkent munaı óńdeýshi zaýyttardy qaıta óndeý jáne jańǵyrtý jobalarynyń iske asyrylý barysy jaıly esepti tyńdady.

QR Energetıka mınıstrliginiń derekterine súıensek, 2014 jyly bul kásiporyndarda shamamen 1,9 mln tonna AI-2 markaly benzın jáne 4,1 mln. tonna dızel otyny óndirildi. AI-92 markaly benzındi ishki tutyný kólemi 2,9 mln tonnany, dızel otyny - 4,9 mln. tonnany qurady. Munaı ónimderiniń jetispeıtin kólemi ımporttaldy.

Úsh otandyq MÓZ qaıta jóndeý men jańǵyrtýdy 2016 jyldyń aıaǵyna deıin aıaqtaý josparlanǵan. Bul ashyq tústi munaımen ishki suranysty tolyqtaı qamtamasyz etýge, 2017 jyly zaýyttardyń jıyntyq qýatyn jylyna 18,5 mln. tonnaǵa ulǵaıtýǵa múmkindik beredi.

Baqytjan Saǵyntaev bekitilgen kestege sáıkes MÓZ qaıta jóndeý jáne jańǵyrtý jumystaryn aıaqtaýdy tapsyrdy. Jobalardy iske asyrý barysy QR Úkimetiniń turaqty baqylaýynda.