B. Saǵyntaev memlekettik qarajat esebinen turǵyn úıdiń josparlanǵan kólemin óz ýaqytynda bitirýdi tapsyrdy

ASTANA. QazAqparat - Búgin Úkimet úıinde QR Premer-Mınıstriniń birinshi orynbasary Baqytjan Saǵyntaev turǵyn qurylysy jáne turǵyn úı-kommýnaldyq sharýashylyq máseleleri boıynsha selektorlyq keńes ótkizdi.

Keńes jumysyna memlekettik organdar, «Nur Otan» partııasy, depýtattyq korpýs, «Báıterek» holdıngi, jergilikti atqarýshy organdardyń ókilderi qatysty.

2015 jyly qarjylandyrýdyń barlyq kózderiniń esebinen turǵyn úıdiń jalpy 7,1 mln. sharshy metrin tapsyrý qarastyrylǵan. 7 mln. sharshy metr paıdalanýǵa berildi.

Turǵyn qurylysyna 586,6 mlrd. teńge ınvestıtsııa baǵyttaldy.

Respýblıkalyq bıýdjet jáne Ulttyq qor qarajaty esebinen atap ótkende, jergilikti atqarýshy organdardyń kezekte turǵan azamattary úshin arendalyq úıdi salý (aǵymdaǵy jyldyń basynan beri 86 myń sharshy metr baspana paıdalanýǵa berildi), jas otbasylarǵa arnalǵan turǵyn úı qurylysy (57,4 myń sharshy metr), turǵynqurylysjınaqtary júıesi arqyly nesıelik baspanany salý (118,4 myń sharshy metr), «Qazaqstandyq ıpotekalyq kompanııa» IU» AQ-nyń jelisi boıynsha turǵyn úı qurylysy júrgizilip jatyr.

Budan basqa, turǵyn úı ınfraqurylymyn nyǵaıtýǵa «Nurly Jol» baǵdarlamasy da baǵyttalyp otyr. 2015-2016 jj. Ulttyq qordan turǵyn úı qurylysyn qosymsha qarajattandyrýǵa jáne qajetti ınjenerlik ınfraqurylymdy salýǵa 180 mlrd. teńge kóleminde qarajat bólinedi.

Keńes qorytyndysy boıynsha Baqytjan Saǵyntaev oblystar, Astana jáne Almaty qalalarynyń ákimdikterine memlekettik qarajat esebinen 2015 jyly turǵyn úıdiń josparlanǵan kóleminiń tapsyrylýyn qamtamasyz etip, salynǵan jáne satyp alynǵan páterlerdi alýǵa kezekte turǵandardyń tizimderin ýaqtyly ázirleýdi, sondaı-aq turǵyn úı qurylysy nysandaryna qajetti ınjenerlik-kommýnıkatsııalyq ınfraqurylymnyń jetkizilýin jyldamdatýdy tapsyrdy.