B. Saǵyntaev qurylys salasyna jańa rettegish quraldardy engizý máselelerine arnalǵan otyrys ótkizdi
ASTANA. QazAqparat - Búgin Úkimet úıinde QR Premer-Mınıstriniń birinshi orynbasary Baqytjan Saǵyntaev kásipkerlik qyzmetti retteý máseleleri boıynsha Vedomstvoaralyq komıssııanyń otyrysyn ótkizdi.
Otyrys kezinde qurylys salasyndaǵy jańa rettegish quraldarynyń qyzmetine qatysty júrgizilgen saraptamalardyń nátıjesi qaraldy, dep habarlaıdy QR Úkimetiniń baspasóz qyzmeti. Ulttyq kásipkerler palatasy men salalyq qaýymdastyqtar bul jańashyldyqqa oń baǵasyn berdi.
Otyrysqa qatysýshylar kelesi rettegish quraldardy engizýdi maquldady. Olar: tapsyrys berýshiniń qyzmetin júzege asyrý jáne qurylys nysandaryndaǵy jumysty iske asyrý úshin qurylys jobalaryn basqarý boıynsha ınjınırıngtik kompanııalardy akkredıtteý; ǵımarattar men qurylymdardyń beriktigi men senimdiligine tehnıkalyq zertteý jáne tehnıkalyq baqylaý júrgizýmen aınalysatyn zańdy tulǵalardy akkredıtteý; qurylys jáne jobalyq uıymdardyń ınjenerlik-tehnıkalyq qyzmetkerlerin attestattaý boıynsha memlekettik emes ortalyqtardy akkredıtteý.
Tıisti jaǵdaılar bolǵan kezde (ózin ózi retteý, jaýapkershilikti bekitý jónindegi zańnyń qabyldanýy) akkredıtteýdiń atalǵan túrleri aldaǵy ýaqytta básekelik ortaǵa tapsyrylady.
Joǵaryda atalǵandardy engizý qurylys jobalaryn basqarýda, tehnıkalyq baqylaý jáne zertteý salasynda, attestatsııalyq ortalyqtardyń jumysyna oń áserin tıgizedi.
