B. Saǵyntaev Qazaqstanda aýyl sharýashylyǵy ónimderiniń kóterme saýda ortalyqtaryn qurýdy usyndy - Úkimet otyrysy
ASTANA. 19 maýsym. QazAqparat - Qazaqstanda aýyl sharýashylyǵy ónimderiniń kóterme saýda ortalyqtaryn qurý qajet.
Bul týraly búgin Úkimettiń selektorlyq farmattaǵy otyrysynda QR Ekonomıkalyq damý jáne saýda mınıstri Baqytjan Saǵyntaev málim etti.
«Qazaqstanda qurylatyn saýda-logıstıkalyq ortalyqtarmen baılanystyra otyryp, oblys ortalyqtarynda aýyl sharýashylyǵy ónimderiniń kóterme saýda ortalyqtaryn qurý qajet», - dedi ol.
Mınıstrdiń sózine qaraǵanda, bul baǵyttaǵy jumystar qazirdiń ózinde bastalyp ketken. Máselen, Taraz qalasynda elimizdiń ońtústigindegi aýmaǵy 35 gektardy quraıtyn «Atakent-Taraz» ámbebap kóterme bazarynyń qurylysy aıaqtalýǵa jaqyn. Aýmaǵy 15 gektardy quraıtyn «Gega» kóterme bazary da salyný ústinde. Al elordada «Azyq-túlik kelisimshart korporatsııasy» AQ qarjysy esebinen qarjylandyrylatyn iri kóterme aýyl sharýashylyǵy bazarynyń qurylysy salynýda.
«Kóterme azyq-túlik bazarlary óńirdiń azyq-túlik qaýipsizdigin qamtamasyz etetindigin jáne bólshek saýdanyń damýynyń ózegi bolatyndyǵyn eskere otyryp, aktsıonerlik qoǵam nysanynda kóterme aýyl sharýashylyǵy bazarlaryn qurýdy yntalandyrý qajet», - dedi B.Saǵyntaev.
Onyń paıymynsha, bul rette memlekettik-jeke áriptestik tetikterin paıdalanýǵa bolady. Máselen, osy oraıda memleket jer ýchaskelerin berý jáne ınjenerlik ınfraqurylymdardy qamtamasyz etý mindetin óz moınyna ala alady.
