B.Saǵyntaev: Qazaqstan «halal» ónimderiniń álemdik naryǵynda óz ornyn tabýy tıis
ASTANA. QazAqparat - Búgin QR Aýyl sharýashylyǵy mınıstrliginiń alqa májilisinde QR Premer-Mınıstriniń birinshi orynbasary Baqytjan Saǵyntaev «halal» ónimderiniń álemdik naryǵyn belsendi ıgerýdi tapsyrdy.
«Keıingi kezderi «halal» azyq-túlik taýarlarynyń óndirisi qarqyn alyp jatqany týraly kóp aıtylýda. Keleshekte bul naryq jylyna 6,5 paıyzǵa ósip otyratyn bolady. 2020 jylǵa qaraı onyń jalpy kólemi 2,5 trln. dollarǵa jetpek. Bul óte úlken naryq, Brazılııa, Frantsııa, Ońtústik Koreıa elderi osy bızneske qyzyǵýshylyq tanytyp otyrǵanda biz munda óz ornymyzdy taýyp alýymyz qajet. Tutynatyn naryqtar da bizge jaqyn - Iran, Ortalyq Azııa, Qytaı, Túrkııa. Osy máselege kelgende bizge belsendirek qımyldaǵan durys bolady», - dedi B.Saǵyntaev.
Bunyń aldynda, vıtse-premer Qazaqstannyń azyq-túlik naryǵy Qytaıǵa baǵyttalýy tıis degen bolatyn. Sebebi kóptegen kelissózderden keıin, Qytaı Qazaqstanǵa óziniń naryǵyn ashyp, azyq-túlik taýarlaryn satyp alýǵa úlken qyzyǵýshylyq tanytýda.
