B.Saǵyntaev Qazaqstan ekonomıkasynyń basty draıverin atady

«Shyndyǵynda da osy jyldyń basynan Qazaqstan álemdik ekonomıka ósiminiń baıaýlaýy jaǵdaıynda damýda. Buǵan deıin atap ótkenimdeı, Qazaqstannyń negizgi eksporttyq taýarlarynyń baǵasy da, suranys ta tómendeýde. «Nurly jol» ınfraqurylymdyq damý memlekettik baǵdarlamasy aıasyndaǵy sharalar men 2015-2016 jyldarǵa arnalǵan Úkimettiń jedel sharalar josparynyń qabyldanýynyń arqasynda biz «mınýsqa» ketpedik, 10 aıdaǵy Qazaqstan ekonomıkasynyń ósimi 1 paıyzdy qurady», - dedi B.Saǵyntaev.

Vıtse-premerdiń alǵa tartqan derekterine sáıkes, Qazaqstanda memlekettik baǵdarlamalardyń aıasyndaǵy ınfraqurylymdyq jobalardy júzege asyrýdyń nátıjesinde negizgi kapıtalǵa salynǵan ınvestıtsııa kólemi 3,8 paıyzǵa ósti. Al taý-ken sektoryndaǵy óndiris kóleminiń quldyraýyna baılanysty ónerkásip óndirisi 1,3 paıyzǵa kemise, óńdeý ónerkásibindegi ósim qarqyny 0,5 paıyzdy quraǵan. Munan bólek, aýyl sharýashylyǵynda, qurylysta, saýdada, kólik pen baılanysta ta ósim baıqalady.

«Gaz salasynda oń dınamıkany atap ótkim keledi. 2015 jyldyń 10 aıynda gaz óndirý kólemi ótken jyldyń sáıkes kezeńimen salystyrǵanda 5 paıyzǵa artyp, 37 mlrd. tekshe metri qurady. Buǵan qosa, jyl sońynda deıin josparlanǵan gaz óndirý kólemi 43,8 mlrd. tekshe metrge teń. Gaz eksportynda da ósim baıqalady. Ótken jyldyń sáıkes kezeńimen salystyrǵanda 14 paıyzǵa ósip, 10 mlrd. tekshe metrge jetti», - dedi ol.