B.Saǵyntaev elimizdegi munaı óńdeý kóleminiń tómendeý sebepterin atady

ASTANA. QazAqparat - Qazaqstannyń munaı óńdeý zaýyttaryndaǵy shıki munaı óńdeý kóleminiń birshama tómendeýiniń birneshe sebebi bar. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Premer-Mınıstriniń birinshi orynbasary Baqytjan Saǵyntaev málim etti.

«Munyń birqatar obektıvti sebebi bar. Ózderińiz de biletindeı, rýbl baǵamynyń ózgerýi reseılik munaı ónimderi baǵasynyń tómendeýine áser etken bolatyn. Osyǵan baılanysty bizdiń zaýyttarymyzdyń rezervýarlyq parkterinde, sonymen qatar qoımalarda ónim irkilisi baıqaldy. Bul bizdiń munaı ónimderimizdiń reseılikterge qaraǵanda birshama qymbattaýynan oryn alǵan edi», - dedi B.Saǵyntaev.

Onyń atap ótýinshe, osyǵan baılanysty reseılik munaı ónimderin ákelýge shekteý qoıý týraly sheshim qabyldanǵan.

«Bul bizderge zaýyttarymyzdy jartylaı bosatýǵa múmkindik berdi jáne zaýyttarymyzdyń munaı óńdeýin odan ary qysqartýyna jol bermedi», dedi Úkimet basshysynyń birinshi orynbasary.