B.Saǵyntaev basshylyq etetin jer zańnamasyn túsindirý boıynsha Komıssııa qajetti sharalardy qabyldaýy tıis - K.Másimov

ASTANA. QazAqparat - Búgin Úkimet Úıinde QR Premer-Mınıstri Kárim Másimov Memleket basshysy N.Á.Nazarbaevtyń 2016 jylǵy 5 mamyrdaǵy keńeste bergen tapsyrmalaryn júzege asyrý máseleleri boıynsha QR Úkimeti otyrysyn ótkizdi, dep habarlady primeminister.kz.

Otyrys barysynda K.Másimov Premer-Mınıstrdiń birinshi orynbasary B.Saǵyntaev basshylyq etetin jer zańnamasyn túsindirý boıynsha Komıssııa qysqa merzimde tıimdi jumys jasaý úshin qajetti sharalar qabyldaýy tıis dep eskertti.

Sondaı-aq, Premer-Mınıstr mynalardy tapsyrdy:

- Ortalyq jáne jergilikti atqarýshy organdarǵa Memleket basshysy jarııalaǵan Jer kodeksiniń keıbir normalaryna kelesi jylǵa deıingi moratorııden týyndaıtyn sáıkes sharalar qabyldaý.

- Jer qatynastaryn retteý salasyndaǵy máselelerdi Ulttyq ekonomıka mınıstrliginen Aýyl sharýashylyǵy mınıstrligine tapsyrý.

- Investıtsııalar jáne damý mınıstrliginen aqparat salasyndaǵy sáıkes fýnktsııalardy tapsyra otyryp, Qazaqstan Respýblıkasynyń jańa Mınıstrligin qurý boıynsha qajetti rásimder júrgizý.

- Densaýlyq saqtaý jáne áleýmettik damý mınıstrligine mindetti medıtsınalyq saqtandyrýdy engizý boıynsha is-qımyldyń Jol kartasyn ázirleý.

- Bilim jáne ǵylym mınıstrligine orta mektepterde oqý jylyn uzartý máseleleri boıynsha jáne úsh tildi bilim berýdi engizý merzimderi týraly qoǵamnyń pikirin zertteý.

- Premer-Mınıstrdiń Orynbasary Darıǵa Nazarbaevaǵa óńirlerdegi konsýltatsııalyq ortalyqtarmen birge Úkimet janyndaǵy biryńǵaı sall-ortalyq - júrgizilgen reformalar týraly túsindirý úshin «jedel jeli» qurý.