B.Saǵyntaev aldaǵy jylý berý maýsymyna daıyndyq máseleleri boıynsha keńes ótkizdi
«Nysandardy 2016-2017 jyldardaǵy jylý berý maýsymyna daıyndaý kommýnaldyq qyzmettermen kelisilgen kestelerge sáıkes júzege asyrylýda. 2 energoblokty, 16 qazandyqty jáne 12 týrbınany jóndeý aıaqtaldy. Jylýmen qamtamasyz etý jelileriniń ázirligi 54%, elektrmen jabdyqtaý - 55%, bilim berý nysandary - 65%, densaýlyq saqtaý nysandary - 64%, turǵyn úıler - 46% quraıdy», delingen habarlamada.
Baqytjan Saǵyntaev aıtyp ótkendeı, qazandyqtardy daıyndaý boıynsha jumystardyń tómen qarqyndary Almaty oblysynda (32%), jylý jelileri boıynsha - Ońtústik Qazaqstan oblysynda (40%), bilim berý nysandary boıynsha - Almatyda (29%) baıqalýda.
Qýaty 100Gkal/saǵ deıingi jylý kózderinde otynǵa suranys aldaǵy jylý berý maýsymyna 1 953 myń tonna kómirdi jáne 196 myń tonna mazýtty quraıdy. Oǵan qosa, 525 myń tonna kómir jáne 79 myń tonna mazýt daıyndalyp qoıyldy.
Keńes qorytyndysy boıynsha Baqytjan Saǵyntaev energetıka, ulttyq ekonomıka, bilim jáne ǵylym, densaýlyq saqtaý jáne áleýmettik damý mınıstrlikterine nysandardy aldaǵy jylý berý maýsymyna daıyndaý barysyn turaqty túrde baqylaýdy júzege asyrýdy tapsyrdy.
Oblystar, Astana jáne Almaty qalalarynyń ákimdikterine barlyq jóndeý naýqandaryn tolyq oryndaý, kommýnaldyq sektor men áleýmettik sala nysandarynyń jylý berý maýsymyna ýaqytyly daıyndaý, ákimderdiń orynbasarlaryna jeke jaýapkershilik artý, sondaı-aq kommýnaldyq qyzmetterge debıtorlyq qaryzdy tómendetý jáne aǵymdaǵy qaryzdyń artýyna jol bermeý boıynsha sharalar qabyldaý tapsyryldy.
