B.Saǵyntaev ákimdikterge saýda oryndaryndaǵy baǵany baqylaýdy tapsyrdy

Astana. QazAqparat - Búgin Úkimet úıinde QR Premer-Mınıstriniń birinshi orynbasary Baqytjan Saǵyntaev áleýmettik mańyzy bar taýarlarǵa baǵany turaqtandyrý, kommýnaldyq tarıfter, kóktemgi sý tasqynyna ázirlik máseleleri boıynsha selektorlyq májilis ótkizdi, dep habarlady Úkimettiń baspasóz qyzmetinen.

Májilisti ashqan B. Saǵyntaev qazirgi tańda óńirlerde áleýmettik mańyzy bar taýarlarǵa baǵanyń negizsiz ósýin boldyrmaý boıynsha apta saıynǵy jumys júrgizilip jatqanyn atap ótip, atalmysh máselege baılanysty ortalyq memlekettik organdar basshylary men oblystarjáne Astana men Almaty qalalarynyń ákimderiniń esebin tyńdady.

«20 aqpandaǵy jaǵdaı boıynsha Básekelestikti qorǵaý agenttigi áleýmettik mańyzy bar taýarlar boıynsha monopolııaǵa qarsy zańnamany buzǵan 49 naryq sýbektisine qatysty 14 tergeýdi bastady», - dedi BQA tóraǵasynyń orynbasary Tımýr Baımuqanov. Onyń aıtýynsha, alypsatarlyq ósimge jol bermeý maqsatynda agenttik iri bıznes sýbektilerine 900-den astam hat jibergen.

Sondaı-aq Munaı jáne gaz vıtse-mınıstri Maǵzum Myrzaǵalıev tutastaı respýblıka boıynsha janar jaǵarmaı baǵasy ózgermegenin, taıaý ýaqytta da kóterý boljanbaıtynyn habarlady.

Oblys ákimdikteri birqatar óńirlerde jekelegen taýar túrlerine baǵany kótergender bar ekendigin aıtty. Sonymen qatar, olar «azyq-túlikke baılanysty dúrlikpe men tapshylyq baıqalmaıdy» dep sendirdi.

Osyǵan baılanysty B.Saǵyntaev ákimdikterge saýda oryndarynda úzdiksiz jumys isteýdi qamtamasyz etýdi, negizgi azyq-túlik ónimderine jáne JJM-ǵa kúndelikti baǵa monıtorıngin júzege asyrýdy tapsyrdy.