B.Obama: Reseıdiń DSU-ǵa kirýi búkil álemdik ekonomıkaǵa tıimdi
ASTANA. 10 jeltoqsan. QazAqparat - AQSh Prezıdenti Barak Obama Reseıdiń Dúnıejúzilik saýda uıymyna kirý josparyn batyl qoldady.
«Men RF DSU múshesi bolatynyna senemin. Óz tarapymyzdan biz muny júzege asyrý úshin barynsha kúsh-jiger jumsaýǵa tıispiz», - dep málimdedi amerıkandyq kóshbasshy eksport jónindegi óz keńesshilerimen kezdesýinde. Reuters agenttigi Aq úı basshysynyń «Reseıdiń DSU-ǵa kirýi bul elge de, bizder úshin de jáne búkil álem ekonomıkasy úshin de tıimdi», - degen sózderin keltirgen.
Reseı DSU-ǵa 2011 jyldyń sońyna deıin qosylýdy josparlap otyr. Búgingi tańda Reseı osy halyqaralyq qurylymǵa yqpaldaspaǵan iri ekonomıkaly el bolyp otyr. Dúnıejúzilik banktiń baǵalaýynsha, DSU-ǵa kirýi orta merzimdi persektıvada Reseıdiń jalpy ishki óniminiń 3,3 paıyzǵa, al uzaq merzimde - 11 paıyzǵa deıin artýyna járdemdesedi.
