B.Obama Aýǵanstanda tálibterdiń jeńiletinine senimdi
ASTANA. Naýryzdyń 29-y. QazAqparat - Kútpegen jerde Kabýlǵa sapar jasaǵan AQSh Prezıdenti Barak Obama, Aýǵanstanda «Talıban» ekstremıstik qozǵalysynyń jeńiletindigine senim bildirdi.
B.Obama bul týraly Baǵramdaǵy NATO áýe bazasynda amerıkandyq áskerılermen bolǵan kezdesýde málim etti, dep habarlaıdy Associated Press agenttigi.
B.Obama óz sózinde, eger «Talıban» músheleri Aýǵanstandy qaıta baqylaýlaryna alatyn bolsa, AQSh azamattarynyń ómirlerine qaýip tónetinin atap kórsetti. Biraq ta onyń aıtýynsha, el Aýǵanstandaǵy AQSh mıssııasynyń jeńisine senip otyr.
Aq úı basshysy sondaı-aq «Talıbanmen» kúresýdiń qıyn kúnderi áli alda ekenin jáne jaýyngerlik operatsııalar barysynda aýǵan armııasy men NATO áskerleri tarapynan adam shyǵyndary bolý múmkindigin moıyndady.
Esterińizge sala keteıik, B.Obama Aýǵanstanǵa jeksenbi kúni kútpegen saparmen keldi. AQSh Prezıdenti sapar barysynda Aýǵanstan basshysy H.Karzaımen kezdesti.
