B. Nurymbetov Dúnıejúzilik banktiń 100 mln. dollar qarjysy qaıda baǵyttalatynyn aıtyp berdi
Atalǵan baǵdarlama aıasynda 550 kásibı standarttardy ázirlep, bekitý josparlanyp otyr. Bul óz kezeginde ulttyq biliktilik negiziniń barlyq segiz deńgeıin qamtymaq. Sonymen qatar biliktiliktiń ulttyq júıesi salasynda normatıvtik quqyqtyq baza men ádisnama qaıta qaralady, kásibı standarttardy qoldaý men jańartý úshin avtomattandyrylǵan ulttyq baza qurylady jáne arnaıy oqytý arqyly ulttyq sarapshylardyń banki qalyptastyrylady.
«Munymen qosa, joba aıasynda mamandyqtardyń biryńǵaı ulttyq toptastyrýshysy ázirlenip, bekitilmek. Ol óz kezeginde 8 myńnan astam mamandyqty, jumysshylar men qyzmetkerler laýazymdaryn biriktiredi»,-dedi vıtse-mınıstr.
B. Nurymbetovtiń aıtýynsha, kásibı standarttar negizinde 173 bilim berý baǵdarlamalary daıarlanyp, bekitiledi. Sondaı-aq munaı men gaz, taý-ken, metallýrgııa, týrızm, mashına jasaý men qurylys salalary úshin testileý jáne sertıfıkatsııanyń arnaıy bes ortalyǵy qurylady dep kútilýde.
Belgili bolǵandaı, halyqqa sapaly qyzmet kórsetýdi arttyrý úshin elimiz boıynsha barlyq jumyspen qamtý qyzmetteriniń jumystaryna taldaý jasalady. Osy oraıda meterıaldyq-tehnıkalyq bazanyń jaǵdaıy baǵalanbaq.
Bilim berý qyzmetterin jetkizýshilerdiń meterıaldyq-tehnıkalyq bazasyn jabdyqtaý iske asyrylady. Ol úshin el boıynsha 64 kolledj iriktelinedi. Barsha óńirlerde 2 myńǵa jýyq óndiristik sheberler iriktelinip, oqytylady. Sonymen qatar 5 jyldyń barysynda oqytý kýrstarynda jumyssyzdar, jaldamalary jumysshylar jáne ónimsiz jumystarda qamtylǵan 20 myńnan astam adamdy oqytý josparlanǵan.
Budan buryn habarlanǵandaı, Dúnıejúzilik bank pen QR Densaýlyq saqtaý jáne áleýmettik damý mınıstrligi resmı túrde Qazaqstandaǵy jumyspen qamtý nátıjelerin jaqsartýdy qarastyratyn «Eńbek mashyqtaryn damytý jáne jumys oryndaryn yntalandyrý» jobasyn bastady.
Mınıstrliktiń málimetine qaraǵanda, atalǵan joba 2014 jylǵy QR Úkimeti men Dúnıejúzilik bank tobynyń Seriktestik týraly shektelmeli kelisimin júzege asyrý aıasynda iske asyrylatyn bolady.
Kórsetilgen kelisimge sáıkes,birqatar jobalardy halyqaralyq qarjylyq uıymdarmen birge iske asyrý josparlanyp otyr. Onyń ishinde Halyqaralyq Qaıta qurý jáne Damý Banki (100 mln.AQSh dollary) men respýblıkalyq bıýdjettiń ortaq qarjylandyrýy (37 mln. AQShdollary) esebinen júzege asyrý josparlanyp otyrǵan «Eńbek mashyqtaryn damytý jáne jumys oryndaryn yntalandyrý» jobasy da bar.
