B.Netanıahýdiń Astanaǵa sapary ekijaqty baılanysty tereńdetýge serpin beredi dep senemiz - N.Nazarbaev
ASTANA. QazAqparat - Izraıl Premer-Mınıstri B.Netanıahýdiń Astanaǵa josparlanyp otyrǵan resmı sapary ekijaqty baılanystardy tereńdetýge serpin beredi dep senemiz. Bul týraly búgin Aqordada birqatar shet el Elshisinen senim gramotasyn qabyldaǵan Elbasy N.Nazarbaev aıtty.
«Qazaqstan Izraılmen yntymaqtastyqtyń aıasyn keńeıtýge aıryqsha mán beredi. Saýda-ekonomıkalyq yntymaqtastyq bizdiń qarym-qatynastarymyzdyń mańyzdy bóligi bolyp sanalady. Búginde Qazaqstanda Izraıl kapıtalynyń qatysýymen 270-ten astam kásiporyn jumys istep jatyr. Qazirgi daǵdarys jaǵdaıynda barlyq baǵyttar boıynsha qaýymdasýdyń mańyzy zor», - dep atap ótti Elbasy.
Osy rette Memleket basshysy aqparattyq tehnologııalar, ınnovatsııa, medıtsına jáne aýyl sharýashylyǵy perspektıvaly salalarǵa aınalyp otyrǵanyn basa aıtty.
«Astanada, ózderińiz bilesizder, «EKSPO-2017» halyqaralyq kórmesin ótkizý turǵysynan biz Izraıldiń ozyq tehnologııasyna jáne balamaly energetıka salasyndaǵy jańalyqtaryna múddelimiz. Izraıldiń Eýrazııalyq ekonomıkalyq odaqpen erkin saýda aımaǵy jónindegi kelisimge qol qoıýǵa umytylysyn biz qoldaımyz. Izraıl Premer-Mınıstri Bınıamın Netanıahýdiń Astanaǵa josparlanyp otyrǵan resmı sapary eki jaqty baılanystardy tereńdetýge serpin beredi degen senimdemiz», - dedi N.Nazarbaev.
Aıta keteıik, búgin Aqordada QR Prezıdentine BUU Damý baǵdarlamasynyń Qazaqstandaǵy turaqty ókili, BUU-nyń turaqty úılestirýshisi Norımasa Shımomýra, Izraıl Elshisi Mıhaıl Brodskıı, Ózbekstan Elshisi Ikrom Nazarov, Ázerbaıjan Elshisi Rashad Mammadov, Taıland elshisi Nat Pınovattanachıp senim gramotasyn tabys etken bolatyn.
