B. Momyshulynyń «Qanmen jazylǵan kitap» atty kitabynyń qazaq tiline aýdarylǵan nusqasy jaryq kórdi

Kitap «Polıgrafkombınat» JShS-niń baspasynan 1000 danamen basylyp shyqty. Ony aýdarǵan belgili zertteýshi, M.H. Dýlatı qoǵamdyq qorynyń dırektory Muhtar Qazybek.

«Baýyrjan Momyshuly muralarynyń ishindegi eń asyly, osy «Qanmen jazylǵan kitap» bolǵandyqtan qaıtadan qolǵa alyp, 6 aıda aýdaryp shyqtym. 45 betteı alǵysóz jazyp, sonymen qatar 35 betteı qosymsha materıaldaryn aýdaryp engizdim. Osy kitapqa batyrdyń jeke muraǵatynda saqtalyp kelgen asa qundy da, sırek kezdesetin muralary endi. Atap aıtqanda, muralarynyń biregeıi - Ekinshi dúnıejúzilik soǵys júrip jatqan kezde, 1944 jyldyń 19-26 qańtary aralyǵynda KSRO Ǵylym akademııasynyń qazaq fılıalynda ǵylym, ádebıet, óner qyzmetkerleriniń aldynda oqyǵan dáristeri kirdi. Bul ádebı mura óziniń mazmuny men sıpaty, qozǵalǵan máseleleriniń aýqymy jaǵynan asa baı. Sonymen qatar, kitapqa engen onyń sózderi men baıandamalarynyń, buıryqtary men jaýyngerlerge bergen minezdemeleriniń orny erekshe. Baýyrjan tek áskerı adam, komandır bolǵan joq, ol shyǵarmashylyq tulǵa boldy. Onyń oılarynda, aıtqan pikirlerinde tolǵanystar, tujyrymdar, danalyq sózder, maqal-mátelder kóp. Jaýynger jazýshynyń soǵys psıhologııasy jaıyndaǵy áńgimesiniń, jazýshylarmen kezdesý keshinde sóılegen sóziniń stenogrammasy, óziniń ustazy general I.V.Panfılov týraly júrekjardy syrlary men paıymdaýlary, sonymen qatar maıdannan jazǵan úlken tebireniske toly hattary da saqtalǵan. Bul materıaldardyń barlyǵyn da osy kitaptan taba alasyzdar. Baýyrjan Momyshulynyń patrıotızmge toly, Otan súıýge baýlıtyn bul eńbegin balaýsa jetkinshekter neǵurlym erte oqysa, soǵurlym erte eseıe túsetini kúmánsiz», - dedi Muhtar Qazybek.

Onyń aıtýynsha, orys, árisi álem halyqtary ádebıetinde Momyshuly qaldyrǵandaı mura kezdespeıdi. «Onyń eń bir qundy jaǵy - adam psıhologııasyna maıdan tájirıbesi turǵysynan jasalǵan tyń tańdaýlarynyń sonylyǵy men jańalyǵynda, adam aqyl-oıyn áp-sátte baýrap alatyn qudyrettiliginde jatyr. Batyrdyń jaýyngerlerge, maıdandas dostaryna bergen sıpattama, minezdemeleri adamnyń kókireginde tereń iz qaldyrady», - dep atap ótti zertteýshi.