B.Momyshulynyń 30 tomdyǵy - namysty qaırap, ulttyq sanany kóteretin rýhanı mura - M.Myrzahmetuly
ASTANA. Sáýirdiń 22-si. QazAqparat /Arman Asqarov/ - Búgingi tańda qazaq halqynyń uly batyry, dańqty qolbasshy, jazýshy Baýyrjan Momyshuly shyǵarmalyrynyń 30 tomdyq jınaǵy baspaǵa jiberilip otyr.
Bul týraly búgin Eýrazııa ulttyq ýnıversıtetinde ótken konferentsııada QR Memlekettik syılyǵynyń laýreaty, jazýshy Mekemtes Myrzahmetuly málim etti, dep habarlaıdy QazAqparat.
Ǵalymnyń aıtýynsha, oǵan qosa 10 tomdyq shyǵarmalarǵa Baýkeńniń zamandastary jazǵan estelikter men batyrǵa joldanǵan arnaý óleńderi enip otyr. «Endigi maqsat Baýyrjan Momyshuly entsıklopedııasynyń sóz tizbesin jasaý»,- dedi ol. Búgingi tańda qarjy máselesine baılanysty bul eńbektiń tek úshten bir bóligi ǵana jasalǵan. «Jalpy, dúnıejúzinde Baýkeń týraly jazylǵan eńbekter óte kóp. Solardyń bárin jınap, aýdarý qajet. Sonda Baýyrjan Momyshulynyń 125 jyldyǵyna batyr aǵamyzdyń 100 tomdyǵyn shyǵarýǵa múmkindigimiz bar» - deıdi M.Myrzahmetuly.
«1897 jyly bizdiń halqymyzdyń sany Reseıge qaraǵan búkil túrki halyqtarynyń 52 paıyzyn quraǵan. Qazir bolsa, 20 paıyzǵa jeter-jetpes. Ol ýaqyttyń ishinde ózbekter 12 ret, uıǵyr 6 ret ósse, qazaq 3 ese azaıdy. Biz - tobyrǵa aınalyp kete jazdaǵan halyqpyz. Baýkeń osynyń bárin jaqsy túsingen. Sondyqtan óziniń sanaly ómirin týǵan halqynyń dástúrin, tilin, dilin, tarıhı jadysyn saqtap qalýǵa arnady. Onyń búkil rýhanı kúshi osyny saqtaýǵa jumsaldy. Osy shyndyqtyń bári 30 tomdyq shyǵarmalar jınaǵynda bar. Bul bizdiń namysymyzdy qaıraıdy, ulttyq sanamyzdy kóteredi», - deıdi jazýshy-ǵalym M.Myrzahmetuly.
