B. Momyshuly «Halyq qaharmany» ataǵyna ábden laıyq - depýtat I. Elekeev

aýryzdyń 17-si. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Irak Elekeev qazaqtyń batyr uly Baýyrjan Momyshulyna «Halyq qaharmany» ataǵyn berý týraly usynys jasady,

dep habarlaıdy QazAqparat.

«Qazaqstanda Uly Jeńistiń 65-jyldyǵyn merekeleýge daıyndyq jumystary bastalyp ketti. Halyq sol bir otty jyldardy umytqan joq. Sonymen birge, halyq týǵan otany men adam ómirin qorǵaǵan batyrlaryn da esh ýaqytta esten shyǵarǵan emes. BAQ-ta jarııalanǵan málimetterge súıensek, 2010 jylǵy mamyrdyń 9-yna deıin Uly Otan soǵysy jyldaryndaǵy KSRO tarapynan bolǵan adam shyǵyndarynyń tolyq málimetterin naqtylaýdy aıaqtaý josparlanyp otyr. Al búgingi kúngi málimetterge sensek, sol soǵys jyldary qurban bolǵandardyń sany 26,6 mln. adamdy qurasa, onyń ishinde soǵys qurbandary -8,8 mln.-ǵa taqaý bolypty. Sonymen birge, halyqtyń jadynda Otan qorǵaýshylardyń erlikteri, onyń ishinde panfılovshylardyń erjúrektiligi máńgi saqtalady. Degenmen, sońǵy kezderi 28-panfılovshylar erligine kúmán keltirýshiler de tabylypty. Sondyqtan da, Qazaqstanda óskeleń urpaqqa áskerı-patrıottyq tárbıeni budan da keńinen sińirý qajet dep bilemin. Jastar óz batyrlaryn tanyp, bilýi, olardy qurmettep ósýi tıis», dedi depýtat. Sonymen birge, I. Elekeev jastar úshin erlik pen qaısarlyqtyń sımvoly retinde qazaqtyń batyr uly Baýyrjan Momyshulyn ulyqtaı túsý qajettigin alǵa tartty.

«Elbasynyń bastamasymen B. Momyshulyna Keńes odaǵynyń Batyry ataǵy berildi. Onyń esimi Qazaqstandaǵy mektepter men kóshelerge qoıyldy, elordanyń kórnekti jerinde asqaq eskertkishi boı kóterdi, batyr týraly kóptegen kitaptar jaryq kórdi, fılmder túsirildi. Bıylǵy qysta Máskeýdegi bir mektep B. Momyshulynyń atymen atalatyn boldy. Halyq óz batyryn súıedi, qadirleıdi. Onyń esimi - bizdiń ulttyq maqtanyshymyz, aıbyndylyqtyń nyshany. Ol shyn mánindegi halyqtyń qaharmany. Sondyqtan da, B. Momyshulyna elimizdiń joǵary ataǵy «Halyq qaharmany» ataǵyn berý zańdylyq. Batyr bundaı qurmetke ábden laıyq», dedi depýtat.

Esterińizge sala keteıik, B. Momyshuly - Keńes dáýirindegi Memlekettik syılyqtyń laýreaty, Qyzyl Tý, Eńbek Qyzyl Tý, Halyqtar dostyǵy, 1-shi dárejeli Otan soǵysy, 2 ret Qyzyl Juldyz, Qurmet belgisi syndy ordendermen, medaldarmen marapattalsa, halqynyń shyn mánindegi qaharman ulyna Qazaqstan táýelsizdikke qol jetkizgennen keıin Keńes odaǵynyń Batyry ataǵy berildi.