«B» korpýsynyń memlekettik ákimshilik laýazymdaryna irikteýdiń jańa júıesi engiziledi - Májilis

ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń memlekettik qyzmeti týraly» zań jobasyn birinshi oqylymda maquldady.

Atalǵan qujat Elbasy aıqyndaǵan «100 naqty qadam» Ult josparyndaǵy memlekettik apparattyń kásibıligi men derbestigine baǵyttalǵan sharalardy júzege asyrýǵa baǵyttalady.

Zań jobasynyń negizgi maqsaty memlekettik qyzmetke kirýge, ony ótkerýge jáne toqtatýǵa baılanysty qoǵamdyq qatynastardy retteý bolyp tabylady. Atap aıtqanda, zań jobasymen azamattardy «B» korpýsynyń memlekettik ákimshilik laýazymdaryna irikteýdiń jańa júıesi engiziledi. Máselen, «B» korpýsynyń memlekettik ákimshilik laýazymdaryna alǵash ret nemese qaıtadan kirip otyrǵan azamattar birqatar irikteý satylarynan ótedi.

«Qujat tutastaı alǵanda memlekettik qyzmet salasynda ashyq konkýrstyq irikteýdi qamtamasyz etýge, quzyrettilik negizinde maqsattyq, ıaǵnı laýazymdyq joǵarylatýǵa, nátıjege baılanysty eńbekaqyny anyqtaýǵa baǵyttalady. Bul sharalar memlekettik qyzmettegi tamyr-tanystyq pen zańsyz qamqorshylyqqa qarsy qımyldardy qamtıdy ári qoǵamnyń qajettiligine tolyq jaýap beredi», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov.

Onyń aıtýynsha, memlekettik qyzmetke qabyldaý úsh kezeńnen turatyn konkýrstyq irikteý arqyly júzege asatyn bolady. Bul rette birinshi kezekte kandıdattar zańdardy bilý men quzyrettilik boıynsha testileýden ótedi. Ekinshiden, memlekettik qyzmetkerler qundylyǵyn ustaný boıynsha komıssııalyq baǵalaýlar bolady. Úshinshi kezekte memlekettik organ suhbattasý arqyly kandıdattyń kásibı bilimin, biliktiligin aıqyndaıtyn bolady. «Konkýrstan sátti ótkender úshin úshten alty aıǵa deıingi aralyqta synaq merzimi belgilenedi. Synaq merziminen óte almaǵandar jumystan bosatylady», - dedi Q. Qojamjarov.

Budan bólek, memlekettik qyzmetshilerdiń kásibı áleýetin neǵurlym tıimdi paıdalanýdy qamtamasyz etý maqsatynda memlekettik ákimshilik qyzmetterdiń rotatsııasy júzege asyrylady. Al memlekettik qyzmetshiler basqa jerge rotatsııa kezinde jekeshelendirý quqyǵynsyz memlekettik turǵynjaımen qamtamasyz etiletin bolady.